/2023.01.31/: Нэгдүгээр сарын 19-нд УИХ-ын гишүүн, дэд дарга С.Одонтуяа тэргүүтэй Ардчилсан намынхан даргын сонгуулиа хийж Л.Гантөмөр АН-ын даргаар сонгогдсон билээ.

Тэгвэл өнгөрсөн амралтын өдөр явагдсан АН-ын даргыг сонгох сунгаа болон АН-ын даргыг Дээд шүүхэд бүртгүүлэх талаар АН-ын Ерөнхий нарийн бичгийн дарга Д.Эрдэнэсувд мэдээлэл өглөө.

АН-ын Ерөнхий нарийн бичгийн дарга Д.Эрдэнэсувд: Д.Ганбатыг АН-ын даргаар бүртгүүлэх хүсэлтийг Улсын дээд шүүхэд хүргүүллээ. АН-ын төлөөллийн төв байгууллага буюу эрх бүхий байгууллага Үндэсний бодлогын хорооны нэгдүгээр сарын 25-ны хурлаар АН-ын дарга С.Эрдэнэ-ийн хүсэлтийн дагуу АН-ын даргыг сонгох сунгааныг зарласан.

Энэ сунгаанд АН-ын 200 мянган гишүүдээс 143500 саналын эрхтэй гишүүд санал хураалтад оролцсон байгаа.

АН-ын даргад 7 нэр дэвшигч дэвшсэнээс АН-ын даргад нийтдээ 22 мянган хүний саналыг авсан Д.Ганбатыг сонгосон. Өнгөрсөн долоо хоногийн ням гарагт болсон АН-ын ээлжит бус 16 дугаар их хурлаар намын даргыг ёсчлон батламжилсны дагуу өнөөдөр Дээд шүүхэд материалаа хүргүүлж байна.

Монгол Улсад нэг л Ардчилсан нам байгаа тэрхүү бүртгэлтэй АН-ын дарга нь С.Эрдэнэ гэж хүн байгаа гэв.