/2022.12.29/: Энэтхэгийн эм үйлдвэрлэгч Marion Biotech компанийн үйлдвэрлэсэн сиропыг уусны улмаас 18 хүүхэд амиа алдсан тухай Узбекистаны Эрүүл мэндийн яам мэдээлэв.
Амьсгалын замын цочмог өвчнөөр өвчилж байхдаа "Doc-1 Max" сироп уусан 21 хүүхдийн 18 нь амиа алдсан гэж тус яам мэдээлэв. Уг сироп нь ханиад, томуугийн шинж тэмдгийг арилгах зориулалт бүхий сиропон эм юм.
Сиропын багцад этилен гликол агуулагдаж байсан бөгөөд энэ нь хортой бодис бөгөөд уг сиропыг Узбекистан руу "Quramax Medical" компани оруулж ирсэн гэж яамнаас гаргасан мэдэгдэлд дурджээ.
Мөн сиропыг эцэг эх нь эмчийн жоргүйгээр, хүүхдэд зориулсан стандарт тунгаас хэтрүүлсэн тунгаар өгсөн байж болзошгүй гэж тус мэдэгдэлд дурдсан байна.
Энэтхэг улс мягмар гарагт эмийн үйлдвэрүүдэд чанарын стандартыг хангуулахын тулд улс даяарх зарим эмийн үйлдвэрүүдэд шалгалт хийжээ.
Узбекистаны хэрэг Гамбид болсонтой ижил төстэй шинж тэмдэгтэй байсан бөгөөд Нью Делид төвтэй Maiden Pharmaceuticals компанийн хийсэн ханиадны эсрэг сиропоос болж одоогийн байдлаар нийт 70 хүүхэд амиа алдсан байна.
Энэтхэгийн засгийн газар болон тус эм үйлдвэрлэгч компани хоёулаа хүүхдүүдийн үхэл сиропон эмнээс болоогүй хэмээн үгүйсгэж байгаа аж.
Энэтхэг улсыг "дэлхийн эмийн сан" гэгддэг бөгөөд сүүлийн 10 жилийн хугацаанд эмийн бүтээгдэхүүний экспорт хоёр дахин нэмэгдэж, өнгөрсөн санхүүгийн жилд 24.5 тэрбум ам.долларт хүрчээ.
Узбекистаны Эрүүл мэндийн яамнаас уг хэрэгт цаг тухайд нь дүн шинжилгээ хийгээгүй, шаардлагатай арга хэмжээ аваагүй учир ажилдаа хайнга хандсан хэмээн долоон ажилтнаа ажлаас нь халсан гэж мэдэгдлээ.
Мөн бүх эмийн сангаас "Doc-1 Max" шахмал, сиропыг татан авч байна.
Эх сурвалж: CNN
