Францын эрх баригчид өнгөрсөн амралтын өдрүүдэд болсон үймээн самуун, дээрэм тонуулын дараа аюулгүй байдлыг хангаж чадаагүй гэх шүүмжлэлтэй тулгарч, даваа гарагт Парис, Лилль, Ницца зэрэг хэд хэдэн хотын зарим хэсэгт хөл хорио тогтоожээ. Үймээн самуун нь улс даяар өрнөсөн Засгийн газрын эсрэг эсэргүүцлийн жагсаалын үеэр гарсан байна.

Ерөнхий сайд Себастьян Лекорню Парис хотод бүхэлд нь хөл хорих цаг тогтоохоос татгалзсан ч онц байдал зарлах боломжтой сануулсан. Тэрбээр одоогийн нөхцөлд хотын тодорхой бүс нутагт хэсэгчлэн хөл хорио тогтоох нь илүү оновчтой гэж мэдэгджээ.

Парис хотын цагдаагийн байгууллагаас нийслэлийн зарим бүсэд орон нутгийн цагаар 20:00 цагаас эхлэн эсэргүүцлийн жагсаал зохион байгуулахыг хориглосон захирамж гаргажээ. Мөн Бүгд Найрамдах Улсын талбай (Place de la République) болон Лез-Аль (Les Halles) орчимд 23:00 цагаас хөл хорио тогтоосон байна. Эдгээр хязгаарлалт мягмар гарагийн өглөөний 06:00 цаг хүртэл үйлчлэх аж.

“Эдгээр арга хэмжээг чанд мөрдүүлэхийн тулд цагдаагийн хүчийг байршуулсан” гэж Парисын цагдаагийн газраас гаргасан мэдэгдэлд дурджээ.

Мөн орон нутгийн захирагчдын зөвшөөрлөөр Лилль, Дуа, Ваттиньи, Денен хотуудад ойрын хоёр өдөр буюу 20:00–06:00 цагийн хооронд насанд хүрээгүй хүмүүсийг гадаа зорчихыг хориглосон байна.

Марсель хотод олон нийтийн цуглаан, жагсаал зохион байгуулахыг хориглосон байна. Үүний зэрэгцээ Францын үйлдвэрчний эвлэлүүд арваннэгдүгээр сарын 5-нд ажил хаялт, эсэргүүцлийн жагсаалыг дахин зохион байгуулахаа зарлажээ.

Өнгөрсөн амралтын өдрүүдэд гарсан дээрэм тонуул, жагсагчид болон цагдаа нарын хоорондын мөргөлдөөн нь оюутнуудын хэдэн долоо хоног үргэлжилсэн эсэргүүцлийн дараа өрнөсөн юм. Франц улс ерөнхийлөгчийн ээлжит сонгуулиа зургаан сарын дараа угтахаар бэлтгэж буй энэ үед болсон үйл явдал нь тус улсын улс төр, нийгмийн нөхцөл байдлыг улам хурцатгаж байна. Мөн эдийн засгийн өсөлт сул, улсын өр нэмэгдэж буй зэрэг хүндрэлүүд нийгмийн бухимдлыг улам тэлж байгааг харууллаа.

Эх сурвалж: Reuters