АНУ-ын нэр хүндтэй их сургуулиудын нэг болох Корнеллын их сургуульд 2024 онд болсон гэх бэлгийн хүчирхийллийн хэргийг хоёр жилийн дараа прокурорын байгууллага дахин шалгаж эхэлжээ.
Тухайн үед 20 настай байсан эмэгтэй Корнеллын их сургууль болон уг хэрэгт холбогдсон долоон эрэгтэй оюутныг хариуцагчаар татан, Нью-Йорк мужийн шүүхэд иргэний нэхэмжлэл гаргасан байна.

“МАНСУУРУУЛАХ БОДИС ӨГӨӨД, ОЛОН ЦАГ ХҮЧИРХИЙЛСЭН” ГЭЖ МЭДҮҮЛЖЭЭ
Нэхэмжлэгчийн мэдүүлснээр 2024 оны аравдугаар сарын 19-ний шөнө тэрбээр найзтайгаа уулзахаар Корнеллын Chi Phi fraternity-ийн байранд очжээ. Түүний нэхэмжлэлд дурдсанаар тухайн үед хоёр оюутан түүнд кетамин хэмээн танилцуулсан бодис хэрэглэхийг шахсан бөгөөд улмаар биеэ хянах чадваргүй болсон үед нь бэлгийн хүчирхийлэл үйлдсэн байна. Үүний дараа тухайн оюутнууд fraternity-ийн Snapchat групп чатад болсон явдлын талаар бичиж, бусад гишүүдийг дуудсан гэж нэхэмжлэлд өгүүлжээ. Улмаар нийт долоон эрэгтэй оюутан түүнд олон цагийн турш бэлгийн хүчирхийлэл үйлдсэн бөгөөд хэрэг үүрийн 05:45 цаг хүртэл үргэлжилсэн гэж эмэгтэй мэдүүлсэн байна. Гэхдээ эдгээр нь одоогоор иргэний нэхэмжлэлд тусгасан нэхэмжлэгчийн мэдүүлэг бөгөөд шүүхээр эцэслэн тогтоогдсон гэм буруугийн дүгнэлт биш юм.

КОРНЕЛЛЫН ИХ СУРГУУЛЬ ДОТООД ШАЛГАЛТ ЯВУУЛЖЭЭ

Хохирогч эмэгтэй 2024 оны арваннэгдүгээр сард болсон явдлын талаар их сургуулийн холбогдох байгууллагад мэдэгдсэн байна. Үүний дараа Корнеллын их сургууль дотоод шалгалт, Title IX-ийн хүрээнд шалгалт явуулжээ. Нэхэмжлэгчийн талын мэдээлснээр хэрэгт холбогдсон долоон оюутнаас хоёр нь сургуулиас хасагдсан бөгөөд бусад оюутнуудад мөн сахилгын арга хэмжээ авсан байна. Харин Корнеллын их сургууль оюутнуудын хувийн нууцыг хамгаалах хуулийн шаардлагын улмаас хүн тус бүрт ямар шийтгэл ногдуулсныг дэлгэрэнгүй мэдээлэх боломжгүй гэж мэдэгджээ. Мөн тус их сургуулийн мэдээлснээр Chi Phi-ийн тухайн салбарын үйл ажиллагааг кампуст хориглосон хэвээр байгаа аж.

ПРОКУРОР ЭРҮҮГИЙН ХЭРГИЙГ ДАХИН НЭЭВ

Уг хэргийг 2024 онд цагдаагийн байгууллага шалгасан боловч тухайн үед эрүүгийн яллах дүгнэлт гаргаагүй байна. Харин энэ сард гаргасан иргэний нэхэмжлэлд өмнөх цагдаагийн мөрдөн шалгалтад байгаагүй шинэ мэдээлэл, нотлох баримт тусгагдсан эсэхийг шалгах шаардлагатай гэж Томпкинс тойргийн прокурорын байгууллага үзжээ. Ингээд хоёр жилийн өмнө хаагдсан хэргийг дахин нээж, цаашид эрүүгийн хэрэг үүсгэх үндэслэл байгаа эсэхийг шалгахаар болсон байна. Прокурорын байгууллагаас шинэ мэдээллийг тангарагтны шүүхэд танилцуулах боломжтой гэж мэдэгдсэн байна.
Нөгөө талаас хэрэгт нэр холбогдсон оюутнуудын нэгийн өмгөөлөгч үйлчлүүлэгчийнхээ эсрэг гаргасан мэдэгдлүүдийг няцааж, тэдгээрийг няцаах баримт болон шинжлэх ухааны нотолгоо байгаа гэж мэдэгдсэн байна.

СОШИАЛ ОРЧИНД МАРГААН ДЭГДЭЭД БАЙНА

Хэрэг дахин сөхөгдсөнтэй холбоотойгоор олон нийтийн сүлжээнд Корнеллын их сургуулийн хэргийг хэрхэн шийдвэрлэсэн талаар хүчтэй хэлэлцүүлэг өрнөж байна. Зарим хэрэглэгч хэрэгт холбогдсон оюутнуудын нэр, зураг болон хувийн мэдээллийг нийтэлж, тэдэнд эрүүгийн хариуцлага хүлээлгэхийг шаардаж байгаа бол зарим нь шүүхийн эцсийн шийдвэр гарахаас өмнө нэр холбогдсон хүмүүсийг гэм буруутай мэтээр нийтэд зарлах нь зохисгүй гэж үзэж байна.

Иймээс одоогоор хэрэгт холбогдсон долоон оюутныг “хүчирхийлэгчид” гэж эцэслэн нэрлэх үндэслэл байхгүй бөгөөд тэднийг иргэний нэхэмжлэлд хариуцагчаар татагдсан, мөрдөн шалгалт дахин явагдаж буй хүмүүс хэмээн мэдээлэх нь зүйтэй юм. Корнеллын их сургуулийн оюутантай холбоотой гэх энэхүү хэрэг ийнхүү 2024 онд эхэлсэн мөрдөн шалгалтаас хойш хоёр жилийн дараа дахин олны анхаарлын төвд орж байна.