/2022.04.29/ УИХ дахь Халдашгүй байдлын дэд хороо өнөөдөр хуралдан нэр бүхий 4 гишүүнийг түдгэлзүүлэх эсэх асуудлыг хэлэлцэж дуусжээ.

Энэ талаар тус хорооны дарга Н.Энхболд мэдээлэл өглөө. Тэрээр:

-Гишүүдийн бүрэн эрхийг түдгэлзүүлэх асуудлыг 5 хоногийн дотор шийдэх ёстой. Энэ хугацаанд дэд хороо хоёр удаа хуралдлаа. Мөн УЕПГ болон холбогдох байгууллагууд УИХ-ын нэр бүхий гишүүдээс мэдүүлэг тайлбар авсан. Гишүүдээс бичгээр нэмэлт тайлбар авч, өнөөдөр дэд хороо бүрэлдэхүүнээрээ хуралдаж, нэмэлт тайлбаруудтай танилцлаа.

Уржигдар УИХ-ын даргаас авсан чиглэлийн дагуу хуралдаанаа эхэлсэн. АТГ-аас гишүүдийг нэг удаа гэрчээр дуудаж уулзсан байгаа юм билээ. Энэ асуудлыг мөрдөн шалгах ажиллагаа одоо үргэлжилж байна. Энэ бүхнийг харгалзан үзэж нэр бүхий 4 гишүүний бүрэн эрхийг түдгэлзүүлэх ерөнхий прокурорын саналыг энэ удаад дэмжих боломжгүй байна гэж дэд хороо үзлээ гэв.