/2021.11.10/ Хятад улсын Эрээн хот манай улстай залгаа хилээ хаагаад багагүй хугацаа өнгөрч байна. Цаашдаа өвлийн олимп буюу хоёрдугаар сарыг дуустал хилээ нээхгүй гэх мэдээлэл ч сураг сонсогдоно.
Энэ хугацаанд манай олон компани бараа бүтээгдэхүүний хомсдолд орж байна.
Үүний нэг нь хэвлэх компани. "Түмэн шувуут" өндөгний компанийн захирал Ломбын Эрхэмбаяр нэгэн зүйлийг өөрийн пэйждээ постолжээ. Тэрээр:
"Цаас, хэвлэх үйлдвэрийн түүхий эд тасарч байгаа, өндөгний шошго 30 хувь үнэ нэмэгдэнэ шүү гэж хэвлэлийн компаниас мэдэгдлээ. Эцсийн дүндээ бид хэлбэрийн хойноос арай л их хөөцөлдөж байгаль орчноо сүйтгэж байна. Зөвхөн шошго худалдан авах, наахад Түмэн шувуут ХК дангаараа жилд 170 сая төгрөг. Уг нь бид сав баглаа, шошго ярлык биш өндөг л идэх гээд байгаа. Бид болоод хэрэглэгчид хамтдаа бодох л асуудал. Автобусны билет шиг жижигхээн минимал, QR кодтой наалт байвал манай хэрэглэгчид яаж хүлээж авах бол оо? Мэдээж QR кодыг уншуулбал харин ч илүү их мэдээлэл байж таараа. Өнгө үзэмж бол тааруухан л байна байх" гэжээ.
Түүнчлэн сайжруулсан түлш худалдаалдаг цэгүүдэд шуудайны олдоц муудаж байна гэх мэдээлэл мөн байна. Энэ мэтээр нэг улсаас шууд хамааралтай манай улсын эдийн засаг хүндхэн байдалд орж эхэллээ.
