/2023.08.08/ Өчигдөр Баянзүрх дүүргийн нутаг дэвсгэр Натур орчимд буун дуу гарсан. Энэ хэргийн талаар Цагдаагийн ерөнхий газраас мэдээлэл хийлээ.
Өчигдөр 21 цагийн орчимд цахим тоглоомын газарт хутгатай этгээд нэвтэрсэн гэх дуудлага Цагдаагийн газарт очжээ. Хэргийн газарт очиход 39 настай Б нь 33 настай У-г хутгалж, зугтаасан байжээ. Сэжигтэн Б-г эрэн сурвалжилсны эцэст 40 минутын дараа, Бөхийн өргөөний хажуугийн байрнаас саатуулан шалгасан байна.
Тухайн этгээд хоёр гартаа хутга скочодсон байжээ. Цагдаагаас хутгаа тавих шаардлагыг тавьсан ч "Би шийдсэн хүн" хэмээн дайрч, бусдын амь насанд заналхийлсэн тул түүний үйлдлийг резинэн сумтай буугаар буудаж зогсоожээ.
Б нь нийт таван удаагийн ял шийтгэлтэй этгээд байжээ. Мөн цагдаа нарт баривчлагдах үедээ "Бага насны хүүхэдтэйгээ уулзмаар байна" гэдэг хүсэлтийг тавьсан байна.
