/2022.08.08/ Гадаад харилцааны сайд Б.Батцэцэг БНХАУ-ын Төрийн зөвлөлийн гишүүн, Гадаад хэргийн сайд Ван И-тэй өнөөдөр буюу наймдугаар сарын 8-ны өдөр албан ёсны хэлэлцээ хийлээ. Үүний дараагаар хоёр улсын Гадаад харилцааны сайд нар Төрийн ордонд мэдээлэл хийсэн юм.

Тэгвэл БНХАУ-ын Гадаад хэргийн сайд Ван И мэдээлэл хийх үеэрээ хүмүүнлэгийн салбарын хамтын ажиллагааны хүрээнд БНХАУ-д суралцаж буй оюутнуудыг үргэлжлүүлэн танхимаар хичээллүүлэхээр тохиролцсон талаар дурдсан юм. Түүнчлэн хоёр улсын иргэдийн харилцан зорчих хөдөлгөөнийг хялбаршуулж сэргээхээр ярилцсан хэмээн мэдээлэв.