/2022.07.29/: Киев эзлэгдсэн өмнөд Херсон мужийг эргүүлэн авахаар хүчээ эрчимжүүлж байх үед Орос Украин даяар пуужингийн хүчтэй цохилт өгчээ.
Төвийн Кропивницкий хот руу пуужин харвасны улмаас таван хүн амиа алдаж, 26 хүн шархадсан гэж албаны хүмүүс мэдэгдэв. Зүүн зүгийн Бахмут хотод гурван хүн нас баржээ.
Киевийн ойролцоох цэргийн баазад 15 хүн шархадсан байна. Украины хойд болон өмнөд мужууд ч мөн адил цохилтод өртжээ.
Энэ нь Украин өмнөд хэсэгт Оросын цэргийг тусгаарлан бүслэхээр оролдож байгаатай холбоотой дайралт хэмээн таамаглаж байгаа юм.
Украины арми АНУ-аас нийлүүлсэн алсын тусгалын пуужингаар цохисны дараа Херсон хотын гол гүүр нурсан байна. Энэ нь Оросын армийг Антоновскийн гүүрээр зэвсгээ илгээх боломжгүй болгожээ.
Оросын түрэмгийлэл эхэлснээс хойш эзлэгдсэн Украины бүс нутгийн цорын ганц нийслэл одоо бараг бүтэн чөлөөлөгдсөн хэдий ч Москва одоо Херсон мужийг хамгаалахын тулд Украины зүүн нутгаас хүчээ дахин байршуулж байна гэж Украины арми анхааруулжээ.
ОХУ-ын цэргүүд эвдэрсэн гүүрний ойролцоо понтон гарам байгуулах гэж оролдож буйг харуулсан зургууд гарч ирэв.
Крым руу хуурай замын коридор болж өгдөг учраас Херсоныг хянах нь Оросын хувьд чухал юм.
Кировоград мужийн нийслэл Кропивницкийд нисэхийн сургууль орон нутгийн цагаар мягмар гарагийн 12:20 цагийн орчимд Оросын хоёр пуужинд оногдсон тухай бүс нутгийн дарга Андрей Райкович хэвлэлийн бага хурал дээр мэдэгдэв.
Зүүн Донецк мужид орших Бахмут хотод Оросын буудлагын улмаас орон сууцны 12 барилга эвдэрч, гурван хүн амиа алдаж, гурван хүн шархадсан гэж бүс нутгийн дарга Павло Кириленко мэдэгдэв.
Нийслэл Киевээс хойд зүгт 10 км зайд орших Лютиж дэх цэргийн баазыг Оросын зургаан Калибр пуужингаар онож, 15 хүн шархадсан гэж Украины цэргийн өндөр албан тушаалтан Олексий Хромов мэдэгдэв. Амиа алдсан эсэх талаар тэрээр тодруулаагүй байна.
Украины зүүн төвийн Днепропетровск мужийг ОХУ-ын зэвсэгт хүчин их буугаар буудсаны улмаас нэг хүн амь үрэгдэж, хоёр хүн шархадсан гэж орон нутгийн албаныхан мэдээлэв.
