/2022.11.22/: Өнөөдөр Бээжин хотын цэцэрлэгт хүрээлэн болон музейг хаасан бөгөөд Хятадын бусад хотууд Ковид-19-ийн шинжилгээг бүх нийтээр авах журмыг сэргээлээ.
Хятад улсад өчигдөр 28,127 шинэ тохиолдол бүртгэгдсэн нь дөрөвдүгээр сарын халдварын оргил үеийн тоон үзүүлэлттэй ойртож байгаа аж. Өмнөд хэсгийн Гуанжоу хот болон баруун өмнөд Чунцин хотууд нийт тохиолдлын тал орчим хувийг эзэлж байна. Нийслэл Бээжинд тохиолдлын тоо мөн дээд амжилт тогтоож, оршин суугчдыг гэртээ үлдэхийг уриалж байна.
Хятад улс одоогийн давалгааны эсрэг тэмцэхдээ сүүлийн үеийн зохицуулалтыг туршиж байгаа бөгөөд энэ нь өргөн хүрээг хамарсан хөл хорионоос зайлсхийж, хяналт тавих арга хэмжээндээ илүү анхаарахыг зорьж байгаа юм.
Өчигдөр Бээжин тахал өвчний хамгийн хүнд сорилттой тулгараад байгаа тухайгаа зарласан бөгөөд хотод нэвтрэх журмыг чангатгаж, гадаадаас ирсэн хүмүүсийг гурван өдөр гэртээ байж Ковидын шинжилгээнд хамрагдахыг шаардаж байна.
Өвчний тархалтын улмаас олон музей хаагдсан бөгөөд мягмар гарагт Аз жаргалтай хөндийн зугаа цэнгэлийн парк, Чаоян цэцэрлэгт хүрээлэн зэрэг гүйгчид, иргэд олноор цуглардаг газруудыг хаана гэж мэдэгдэв. Бээжин хотод ням гарагт 962 тохиолдол бүртгэгдсэн бол өчигдөр 1,438 шинэ тохиолдол бүртгэгдсэн байна.
Эх сурвалж: Theguardian
