/2022.10.14/: Бахрайны Манама хотод хүндийн өргөлтийн насанд хүрэгчдийн Ази тивийн аварга шалгаруулах тэмцээн гурав дахь өдрөө болж байна.

Эрэгтэйчүүдийн 50, эмэгтэйчүүдийн 31 дэх удаагийн тэмцээнд Монгол улсаас дөрвөн тамирчин өрсөлдөж байгаа бөгөөд эмэгтэйчүүдийн 76 кг-ын жингийн огцом өргөлтийн төрөлд Үндэсний шигшээ багийн тамирчин О.Дархижав 98 кг-ыг өргөснөөр мөнгөн медаль хүртлээ.

Тэрбээр түлхэлттэй өргөлтөөр медаль хүртээгүй ба нийлбэр дүнгээр дөрөвдүгээр байр эзэлсэн юм.

О.Дархижав Монголын багийн гурав дахь медалийг авчирсан бөгөөд маргааш гавьяат тамирчин М.Анхцэцэг өрсөлдөх юм.