/2022.09.21/: Олон улсын эрүүгийн цагдаагийн байгууллага-Интерполын Ерөнхий нарийн бичгийн даргын газрын “Ази, Номхон далайн бүс нутгийн Үндэсний төв товчоодын үйл ажиллагааг зохицуулах алба”-ны дарга ноён Тен Хин Флипп Чао тэргүүтэй төлөөлөгчид Монгол Улсын Интерполын Үндэсний төв товчооны үйл ажиллагаатай танилцах зорилгоор Цагдаагийн ерөнхий газарт энэ оны есдүгээр сарын 20-22-ны өдрүүдэд албан ёсны айлчлал хийж байна.

Айлчлалын хүрээнд Цагдаагийн ерөнхий газрын дарга, Дотоодын цэргийн командлагч, Интерполын Үндэсний төв товчооны дарга, хошууч генерал Ж.Болд Интерполын төлөөлөгчдийг хүлээн авч уулзлаа.

Уулзалтын үеэр Интерполын төлөөлөгчид Монгол Улсын Цагдаагийн ерөнхий газрын даргын шууд удирдлага дор ажилладаг Интерполын Үндэсний төв товчоо нь үндэстэн дамнасан зохион байгуулалттай гэмт хэрэгтэй тэмцэх чиглэлээр Интерполоос зохион байгуулж буй бүхий л төрлийн тусгай ажиллагаа, арга хэмжээнүүдэд тогтмол идэвхтэй оролцдог Ази, Номхон далайн бүс нутаг дахь хамгийн шилдэг Үндэсний төв товчоодын нэг болохыг дурдаад цаашид Интерполын зүгээс Монгол Улсын цагдаагийн байгууллагад бүхий л чиглэлээр дэмжлэг үзүүлж хамтран ажиллах болно гэдгээ илэрхийлэв.

Мөн уулзалтын үеэр Интерполын төлөөлөгчид үндэстэн дамнасан санхүүгийн гэмт хэрэг, залилан мэхлэх гэмт хэрэгтэй тэмцэх чиглэлээр Интерполоос шинээр санаачлан хэрэгжүүлж буй ажил, арга хэмжээнүүдийн талаар танилцуулга мэдээлэл өгч, Монгол Улсын цагдаагийн байгууллагын зүгээс тухайн ажил, арга хэмжээнүүдийг бүрэн дэмжиж, Интерполтой нягт хамтран ажиллахаа илэрхийлсэн юм.

Эх сурвалж: ЦЕГ