/2022.09.02/: МУИС-ийн Олон улсын харилцаа, нийтийн удирдлагын сургуулийн IV түвшний оюутан Х.Баянмөнх компьютер, принтерийн иж бүрдэл, “Болор дуран” программын хамт хүлээн авлаа.
НҮБ-ын Ерөнхий Ассамблейн шийдвэрээр жил бүрийн зургаадугаар сарын 23-ны өдөр тэмдэглэдэг “Олон улсын төрийн албаны өдөр”-ийг тохиолдуулан их сургууль, дээд сургууль, коллежийн бакалаврын түвшний ангид суралцдаг оюутнуудын дунд “Итгэл хүлээсэн төрийн албан хаагч” сэдэвт эсээ бичлэгийн уралдааныг Төрийн албаны зөвлөл болон НҮБ-ын Хөгжлийн хөтөлбөртэй хамтран хэрэгжүүлж буй “Монгол Улсад мэргэжлийн, иргэн төвтэй төрийн албыг бэхжүүлэх нь” Төслийн нэгжээс хамтран зарласан билээ.
Өнөөдөр Төрийн албаны зөвлөлийн дарга Б.Баатарзориг тус сургуульд зочилж Х.Баянмөнхийн семинарын хичээлийн төгсгөлд багш, оюутнуудын хамт уралдааны шагналыг гардуулж, төрийн албаны ирээдүйн залуу халаа болон бэлтгэгдэж буй оюутнуудад сурлагын амжилт хүсэн оюутан залуусын оролцоог төрийн албаны шинэтгэлд өргөжүүлнэ гэлээ.
Оюутан Х.Баянмөнх: “...чанартай, олон шат дараагүй цомхон үйлчилгээ, ажилдаа сэтгэл хангалуун, нийгмийн баталгаагаар хангагдсан төрийн албан хаагч болон төрийн албаны шинэ үе, шинэтгэлийн ажлууд гүүр болж өгнө” хэмээн санаагаа илэрхийлжээ.
Тус үйл ажиллагаанд Төрийн албаны зөвлөлийн Сургалт судалгаа, мэдээллийн нэгдсэн сангийн газрын дарга Ж.Эрдэнэбат, “Монгол Улсад мэргэжлийн, иргэн төвтэй төрийн албыг бэхжүүлэх нь” төслийн зөвлөх, доктор Д.Дэмчигсүрэн, МУИС-ийн Олон улсын харилцаа, нийтийн удирдлагын сургуулийн захирал, доктор, дэд профессор Ж.Баттогтох, зөвлөх профессор, доктор Н. Бурмаа, тэнхимийн эрхлэгч доктор, дэд профессор Г.Баасанжав нар оролцов.
Эх сурвалж: ТАЗ
