Шотландын Speyside бүсийн GlenAllachie нэрэх үйлдвэр Монголын онгон царс модоор хийсэн торхонд нэмэлтээр боловсруулсан, дэлхийн зах зээлд худалдаалагдах анхны шотланд вискигээ танилцууллаа.

GlenAllachie Distillery нь туршилтын шинж чанартай Sinteis Series цувралынхаа дөрөв дэх хувилбар болох Sinteis Part IV-ийг худалдаанд гаргасан байна. Энэхүү хязгаарлагдмал тоогоор үйлдвэрлэсэн single malt шотланд виски нь 10 жилийн настай бөгөөд Монголын онгон царс модоор хийсэн торхонд нэмэлт боловсруулалт хийснээрээ онцлог болжээ.

Уг виски нь 2015 онд нэрсэн бөгөөд 58.5 хувийн спиртийн агууламжтай, cask strength буюу торхноос гаргасан хүчээрээ савлагдсан байна. Мөн байгалийн өнгийг нь хадгалж, хүйтэн шүүлтүүрийн боловсруулалт хийгээгүй аж.

Гурван торх, гурван түүх, нэг виски

Sinteis Part IV-ийн үндсэн санааг “A Convergence of Three: Three Casks, Three Stories, One Exceptional Whisky” буюу “Гурвын нэгдэл: гурван торх, гурван түүх, нэг онцгой виски” хэмээн тодорхойлжээ.

Эхлээд вискиг bourbon торхонд боловсруулсны дараа хоёр хэсэгт хувааж, нэг хэсгийг Pedro Ximénez, нөгөөг нь Oloroso sherry торхонд боловсруулсан байна.

Үүний дараа хоёр төрлийн вискиг дахин нэгтгэж, Монголын онгон царс модоор хийсэн ховор торхонд шилжүүлэн нэмэлт боловсруулалт хийжээ.

GlenAllachie-ийн мэдээлснээр энэ арга нь вискиний амт, үнэрт модны төрлөөр дамжуулан шинэ өнгө төрх бий болгох тус үйлдвэрийн туршилт, судалгааны ажлын нэг хэсэг юм.

Монгол царс ямар онцлогтой вэ?

Виски боловсруулсан Монголын царс нь шинжлэх ухааны нэршлээр Quercus mongolica бөгөөд өтгөн, нягт ширхэглэг бүтэцтэй мод юм.

Энэ төрлийн модыг вискиний торх үйлдвэрлэхэд ашиглах нь маш ховор бөгөөд шаардлага хангасан модыг олох нь ч амаргүй аж. Мод нь 100 гаруй жил ургасан, байгалийн жамаар унасан байх шаардлагатай бөгөөд үүний дараа л модыг арилжааны зориулалтаар ашиглах боломжтой гэж GlenAllachie тайлбарласан байна.

Монгол царс нь вискид өтгөн карамель, зандан мод, дорнын хүжний өнгө аясыг бий болгодог гэж үйлдвэрлэгчид онцолжээ.

Харин Oloroso sherry торх нь хатаасан жимс, хар шоколад, самрын амтыг нэмж, Pedro Ximénez торх нь чихэрлэг амт, тоффи болон өтгөн чихрийн сиропын өнгө аясыг бий болгодог байна.

Эцсийн бүтээгдэхүүний амт, үнэрийг хар шоколад, цэцэрлэгийн жимс, бүлээн нарийн боов, мөн инжрийн чанамал, какао, шанцай, чихэрлэсэн цагаан гаа, ванилийн өнгө аястай хэмээн тодорхойлжээ.

“Бидэнд туршлага бараг байгаагүй”

GlenAllachie-ийн мастер дистиллер Billy Walker Монгол царс ашигласан энэхүү туршилтыг үйлдвэрийн хувьд “сорилт бөгөөд адал явдал” байсан хэмээн тодорхойлсон байна.

Тэрээр Монгол царсны ховор байдал болон боловсруулахад “өршөөлгүй” шинж чанартайг онцлоод:

“Бидэнд дагах туршлага бараг байгаагүй. Бид багийн хувьд өөрсдийн зөн совин, туршлагадаа итгэсэн. Бүтээсэн вискигээрээ би үнэхээр бахархаж байна.” хэмээн ярьжээ.

Савлагаанд ч Монголын бэлгэдлийг шингээжээ

Sinteis Part IV-ийн савлагааны загварт Quercus mongolica буюу Монгол царсны дүрслэлээс сэдэвлэсэн гараар зурсан хээ ашигласан байна.

Загварыг мөн төгсгөлгүй зангилаа дүрслэлээр хүрээлсэн бөгөөд энэ нь Зүүн Азийн уламжлалт урлагт байдаг геометрийн хээ, мод, виски болон цаг хугацааны хоорондын уялдаа холбоог бэлгэддэг аж.

Алтан фольгон чимэглэл ашигласан уг загвар нь байгалийн материал болон виски үйлдвэрлэлийн нарийн технологийн тэнцвэрийг илэрхийлэх зорилготой гэж үйлдвэрлэгч тайлбарлажээ.

£75.99-ийн үнээр худалдаалж эхэлжээ

Sinteis Part IV нь хязгаарлагдмал тоогоор үйлдвэрлэгдсэн бөгөөд Их Британид GlenAllachie-ийн үйлдвэр болон онлайн сувгаар худалдаалагдаж эхэлсэн байна.

Үйлдвэрлэгчийн санал болгосон жижиглэнгийн үнэ нь 75.99 фунт стерлинг бөгөөд ойрын долоо хоногуудад дэлхийн бусад зах зээлд нийлүүлж эхлэхээр төлөвлөжээ.

Ингэснээр Монголын ховор Quercus mongolica царс мод Шотландын уламжлалт single malt вискиний үйлдвэрлэлд шинэ өнгө төрх нэмсэн төдийгүй, Монгол царс ашигласан виски дэлхийн зах зээлд анх удаа албан ёсоор гарсан хэмээх онцлох үйл явдал болж байна.