Непалд үер, хөрсний нуралтын улмаас нурангид дарагдсан усан цахилгаан станцын хонгилоос хоёр ажилчныг ослоос хойш 10 хоногийн дараа эсэн мэнд аварчээ.

Аврагчид баасан гарагт шавар, нурангиар дүүрсэн хонгилын жижиг нүхээр дамжин хоёр ажилчныг гаргаж чадсан байна. Аврах ажиллагааны үеэр нэг ажилчин шаварт дарагдсан хонгилоос гарч ирэхэд аврагчид баяр хөөртэйгөөр угтан авч, дараа нь түүнийг нисдэг тэрэг рүү хүргэжээ.

Аврагдсан хоёр ажилчныг 30 настай механикийн ахлагч Санжай Шах болон 45 настай механикийн супервайзер Кабир Махаржан гэж тогтоосон байна. Тэднийг эмнэлгийн тусламжид шилжүүлсэн бөгөөд аврах ажиллагаа үргэлжилж байгаа талаар Непалын арми мэдээлжээ.

Тус бүс нутагт наймдугаар сарын 26-нд Хятад, Непалын хил орчмын ууланд мөсөн гол болон хад чулууны асар том нуралт үүсэж, улмаар шавар, нуранги бүхий хүчтэй үер буусан байна. Үүний улмаас усан цахилгаан станцын олон ажилчин хонгилд гацсан бөгөөд аврагчид хэдэн хоногийн турш тэднийг эрэн хайжээ.

Аврагчид Тришули-3А усан цахилгаан станцын хонгилд 50-60 метрийн урттай нурангийг ухаж, дотогш нэвтрэх ажиллагаа явуулж байжээ. Аврах ажиллагаанд Энэтхэг, Хятад, Өмнөд Солонгосын мэргэжилтнүүд мөн оролцсон байна.

Австралийн аврах ажиллагааны мэргэжилтэн Арнольд Дикс аврах багийнхан хонгилын дотроос сулхан хариу сонссон байж болзошгүй гэж мэдээлсэн бөгөөд удалгүй хоёр ажилчныг гаргаж чаджээ. Тэрээр энэхүү аврах ажиллагааг “гайхамшгийн бүсэд эргэн ирсэн” хэмээн тодорхойлсон байна.

Гэвч гамшгийн нөхцөл байдал хүнд хэвээр байна. Непалын гамшгийн асуудал эрхэлсэн байгууллагын мэдээллээр тус улсад 1,259 хүний цогцос олдож, 5,083 хүн сураггүй байна. Харин Хятадын талд 21 хүн амиа алдаж, 541 хүн сураггүй болсон талаар төрийн хэвлэлүүд мэдээлжээ. Ингэснээр хоёр улсын хэмжээнд нийт 1,280 хүн амиа алдаж, 5,624 хүн сураггүй байгаа аж.

Мөн Непал болон Хятадын Төвөдийн бүсэд нийт 34 улсын 800 гаруй гадаадын иргэн сураггүй болсон байна. НҮБ гамшгийн улмаас тусгаарлагдсан бүс нутгуудад тусламж хүргэхэд маш хүндрэлтэй байгааг анхааруулж, ачаа тээврийн дрон болон явган зөөвөрлөгч ашиглах боломжийг судалж байгаа аж.

Аврагдсан хоёр ажилчны тохиолдол нь олон хоногийн турш үргэлжилж буй эрэн хайх ажиллагаанд найдвар төрүүлсэн ховор тохиолдол болж байна.

Эх сурвалж: Dailymai