Коста-Рикагийн Tortuguero National Park орчимд спорт загасчид ер бусын төрхтэй “сувилагч” акул барьсан нь эрдэмтдийн анхаарлыг татжээ.
Тус акулын арьс тод улбар шар өнгөтэй, нүд нь цагаан байсан бөгөөд судлаачдын мэдээлснээр ийм тохиолдол анх удаа шинжлэх ухааны баримтжуулалтад орж байна.
Эрдэмтэд акулын өвөрмөц өнгийг альбинизм болон ксантизм гэсэн хоёр ховор генетикийн өөрчлөлт давхар илэрсэнтэй холбон тайлбарлажээ. Энэхүү хослолыг альбино-ксантохромизм (albino-xanthochromism) гэж нэрлэдэг.
Ердийн өнгөлөн далдлалтаа алдсан ч амьд үлджээ
“Сувилагч” акулууд ихэвчлэн далайн ёроолтойгоо уусахад тусалдаг бор өнгийн арьстай байдаг. Харин энэ акулын тод улбар шар өнгө нь түүнийг махчин амьтдад илүү амархан харагдуулах эрсдэлтэй.
Гэсэн хэдий ч судлаачдын үзэж буйгаар уг акул байгальд тодорхой хугацаанд амжилттай амьдарч чадсан нь ийм ховор генетикийн өөрчлөлттэй амьтан заавал амьд үлдэх чадваргүй гэсэн үг биш болохыг харуулж байна.
Загасчид ховор акулыг гэрэл зургаар баримтжуулсны дараа буцаан далайд нь тавьжээ.
Энэхүү олдвор нь далайн амьтдын дунд маш ховор тохиолддог генетикийн өөрчлөлтүүд хэрхэн илэрдэг, мөн ийм өөрчлөлт нь тухайн амьтны амьд үлдэх чадварт хэрхэн нөлөөлдөг талаар судлах шинэ боломжийг эрдэмтдэд олгож байна.
Эх сурвалж: National Geographic, Live Science
