/2023.12.14/: Pubg Мobile-ийн Дэлхийн аваргын тэмцээний тэргүүн байрыг эзэлсэн багийг ЦХХХ-ны сайд Н.Учрал өнөөдөр хүлээж авч уулзан шагнал гардуулсан.

Тэрбээр өөрийн цахим хуудсаараа дамжуулан "Pubg Мobile-ийн Дэлхийн аваргад амжил гаргасан багуудын бэлтгэлийн байруудад төрийн мэдлийн шугмаас шууд холболт хийж өндөр хурдны интернэтээр үнэ төлбөргүй хангана" гэжээ.

Мөн тэрбээр, "Олон сая хүн амтай, И-Спортдоо төсөв суулгаж, бодлогоор дэмждэг дэлхийн өндөр хөгжилтэй орнуудын шилдэг багуудыг ардаа орхиж оргилд нь гарч чадсан нь орчин цагийн Монгол залуусын чадамжийг илтгэж байна. Мөн E-sport-д хандах олон нийтийн хандлагад эерэг нөлөө үзүүлж байна.

E-Sport эдийн засагт нөлөө үзүүлэх хэмжээнд хөгжих боломжтой. Энэ салбарын хөгжлийн гол хүч бол эдгээр залуус. Төр дэмжих хэрэгтэй.

Тэдэнд тулгамддаг нэг асуудал бол баталгаатай эх үүсвэр бүхий өндөр хурдны интернэт. Ази, Европын дивизонуудад өндөр хөгжилтэй орнуудын багуудтай шууд тоглоход интернэтийн хурдны зөрүүнээс болж оноо алдах тохиолдол бий. Тиймээс мэдээллийн технологи харилцаа холбооны салбарын сайдын хувиар IHC Esports, Stalwart Esports, 4Merical Vibes багуудын өндөр хурдны интернэтийг ямар нэгэн дамжуулагч компаниар дамжуулахгүйгээр төрийн мэдлийн шугмаас шууд холбож, үнэ төлбөргүй ашиглах эрх олгож байна. Ингэснээр баг тамирчдад бэлтгэл хийх ОУ-ын тэмцээн уралдаанд эх орноосоо оролцох боломж бүрдэнэ.

Мөн Дэлхийн аварга “IHC Esport” багийг Монгол Улсын “Цахим элч”-ээр томилж байна. Цаашид ОУ-ын тэмцээн уралдаанд оролцоход салбарын зүгээс дэмжлэг үзүүлж хамтран ажиллах болно.

Цахим спортоор Монгол ур чадвар, Монгол залуусын чадамж дэлхийд аваргалж байгаад харилцаа холбоо, мэдээллийн технологийн салбарын хамт олон бид бахдалтай байна.

Багийн эздэд, дасгалжуулагч нарт, тамирчдын ар гэр, эцэг эхчүүдэд талархал илэрхийлье.

Та бүхэнд спортын өндөр амжилт хүсье" гэжээ.