/2022.03.25/: Хууль зүй, дотоод хэргийн сайд Х.Нямбаатар, Азийн хөгжлийн банкны Монгол Улс дахь Суурин төлөөлөгч Павит Рамачандран нар өрхийн эдийн засгийг дэмжих бичил бизнесийн тэтгэлэгт төсөлд шалгарсан 20 эмэгтэйд өнөөдөр батламж гардуулав.
Энэ үеэр Хууль зүй, дотоод хэргийн сайд Х.Нямбаатар, Азийн хөгжлийн банкны Монгол Улс дахь Суурин төлөөлөгч Павит Рамачандран, тус яамны Төрийн нарийн бичгийн дарга П.Сайнзориг нар бичил төсөл хэрэгжүүлэхээр батламж гардсан эмэгтэйчүүдэд хандан үг хэлж, төслийн үйл ажиллагаанд нь амжилт хүслээ.
Тодруулбал, Хууль зүй, дотоод хэргийн яам, Азийн хөгжлийн банктай хамтран Цэцэглэн хөгжсөн, сөрөг нөлөөнд тэсвэртэй Ази, Номхон далайн бүс нутгийг цогцлоох Японы сангийн буцалтгүй тусламжийн санхүүжилтээр 2019-2023 онд хэрэгжүүлж буй “G9198/G9221-МОН” төслийн хүрээнд “Эмэгтэйчүүдийн эдийн засгийн чадавхыг дэмжих” хөтөлбөрийг хэрэгжүүлж байгаа билээ. Тус хөтөлбөр өнөөдрийн байдлаар Сэлэнгэ, Увс, Сүхбаатар аймаг, Сонгинохайрхан, Налайх дүүрэгт амжилттай хэрэгжиж байна.
Хөтөлбөрийн эхний шатанд нийт 115 эмэгтэй хувь хүний хөгжил, санхүү, хууль эрх зүйн мэдлэг олгох, бизнесийн төлөвлөгөө боловсруулах чадавх бэхжүүлэх сургалтад хамрагдаж, олж авсан мэдлэг, туршлагадаа үндэслэн өрхийн эдийн засгийг дэмжих бичил бизнес эрхлэх төслийг боловсруулсан.
Тэгвэл уг хөтөлбөрийн 2 дахь шатны сургалтад 104 эмэгтэй хамрагдаж, өөрсдийн санаачилсан бичил төслийн саналыг боловсруулж ирүүлснээс 50 эмэгтэйг сонгон шалгаруулж бичил бизнесийн тэтгэлгийг ийнхүү олгохоос өнөөдөр Налайх, Сонгинохайрхан дүүргээс сонгон шалгарсан 20 эмэгтэйд бичил төсөл хэрэгжүүлэх батламжийг ийнхүү гардуулан өглөө.
Төсөл хэрэгжүүлэхээр сонгон шалгарсан эмэгтэйчүүдийн төслийн хамрах хүрээ, ирүүлсэн саналыг үндэслэн тус бүр 2500 ам.доллар хүртэлх тэтгэлгийг буцалтгүй тусламж хэлбэрээр олгоно. Цаашид үргэлжлүүлэн тэдэнд бие даан төслөө амжилттай хэрэгжүүлэх, өрхийн эдийн засгийн тогтвортой байдлыг дэмжих зорилгоор санхүү, маркетинг, гарааны бизнес эрхлэх чадавх бэхжүүлэх сургалтыг үе шаттай зохион байгуулах юм.
Эх сурвалж: ХЗЯ
