/2021.08.30/ Албан үүргээ гүйцэтгэн мэдээ, мэдээлэл бэлтгэж байсан сэтгүүлч, зураглаачийн биед халдсан хэрэг өнөөдөр гарчээ.

Тодруулбал, Хандгайтад хууль бусаар газар эзэмшиж, үйл ажиллагаа явуулж байсан “Ориент инвестмент пропертик” ХХК-ийн үйл ажиллагааны талаар Зариг.мн сайт сурвалжилхаар очсон байна.

Ийнхүү сурвалжилах явцад тус байгууллагын харуул сэтгүүлч, зураглаачийн биед халдаж, гар утсыг нь эвджээ.

Монгол Улс үзэл бодолтой байх, түүнийгээ илэрхийлэх болон мэдээлэл хайх, хүлээн авах эрх чөлөөг баталгаажуулсан олон улсын гэрээ, конвенц, тэдгээрийн нэмэлт протоколд элсэн орж үүрэг хүлээсэн төдийгүй дотоодын суурь хуулиудыг ч баталсан.

Гэвч ийнхүү сэтгүүлчийн биед халдаж буй явдал нь сэтгүүлчээр дамжуулан иргэдийн мэдэх эрхэд халдаж буй хууль бус, бүдүүлэг үйлдэл юм.