/2022.11.30/: Испанийн эргийн хамгаалалтын албаныхан Нигериэс Канарын арлуудад хөлөг онгоцны залуур дээр сууж ирсэн гурван хүнийг аварчээ.

Даваа гарагт эргийн хамгаалалтын газраас нийтэлсэн гэрэл зураг дээр цагаачид газрын тос, химийн бодис тээвэрлэдэг Althini II хөлөг онгоцны залуур дээр гурван хүн сууж байгааг харуулсан байна.

"Althini II" хөлөг онгоц Нигерийн Лагос хотоос 11 хоног аялсны эцэст даваа гарагт Гран Канариа дахь Лас Палмас хотод хүрэлцэн ирсэн тухай "Marine Traffic" гэх хөлөг онгоц мөрдөх вэб сайт мэдээлэв.

"Цагаачдыг боомт руу аваачиж, эрүүл мэндийн үйлчилгээ үзүүллээ" гэж эргийн хамгаалалтын албаныхан твиттер хуудсандаа бичжээ.

Испанийн эзэмшилд байдаг Канарын арлууд нь Европт хүрэх гэж буй Африкийн цагаачдын зорьдог гол газар юм. Испанийн тоо баримтаас харахад арлууд руу далайгаар цагаачлах шилжилт хөдөлгөөн нь оны эхний таван сард өмнөх оны мөн үеэс 51 хувиар өссөн байна.

Өнгөрсөн жил Баруун Африкийн эргээс Канарын арлууд руу 20 мянга гаруй цагаач нэвтэрсэн бөгөөд тэдгээрийн 1100 гаруй нь далайд нас барсан гэж Улаан загалмайн нийгэмлэг мэдээллээ.

Өмнө нь 2020 онд Нигерийн дөрвөн нисгэгч мөн ингэж цагаачилсан бөгөөд тэднийг 10 хоногийн туршид далайд явсан гэж Норвегийн хэвлэлүүд мэдээлжээ.

Мөн онд 14 настай Нигери залуу Испанийн El Pais сонинд Лагосоос Канарын арлууд руу явахдаа түлш ачсан ачааны хөлөг онгоцны жолооны дээд талд байрлах өрөөнд 15 хоног нуугдаж байсан тухайгаа ярьжээ.

Ядуурал, хүчирхийлэл, мөргөлдөөнөөс зугтах гэсэн иргэд Баруун Африкаас ийнхүү зугтааж байна гэж Улаан загалмайн нийгэмлэг мэдэгдэв.