/2022.10.31/ Halloween буюу Сүнсний баяр болж байгаатай холбоотойгоор бага насны хүүхдүүд айлын хаалга тогшиж, чихэр цуглуулдаг. Тэгвэл өнгөрөгч бямба гарагт 9 настай охин нэгэн айлын хаалгыг тогшин чихэр гуйхад биед нь халдсан хэрэг гарчээ.

Энэ талаар цагдаагийн байгууллагаас мэдээлэл өглөө.

Тодруулбал, Уг хэрэг Баянгол дүүргийн 18 дугаар хорооны нутаг дэвсгэрт гарчээ. Цагдаагийн байгууллагад тухайн өдрийн 16:48 цагт “Доод айлын хүн манай хүүхдийн гэдэс рүү өшиглөсөн байна” гэх дуудлага, мэдээлэл бүртгэгдсэн байна. Үүний дагуу тус дүүрэг дэх цагдаагийн газрын нэгдүгээр хэлтсээс шалгалтын ажиллагаа явуулжээ. Ингэхэд “Н” гэх 9 настай эмэгтэй хүүхдийг 56 настай, эрэгтэй “Х” гэгч нь архи, согтууруулах ундааны зүйл хэрэглэсэн үедээ өшиглөсөн гэдэг нь тогтоогджээ. Одоогоор тус хэргийг шалгаж байгаа ажээ.