/2022.10.13/: НЗДТГ нь СU сүлжээг эзэмшигч “Премиум Групп” ХХК-тай нийслэлийн хүн амыг эрүүл хүнсээр хангах, ажлын байр нэмэгдүүлэх, хөдөлмөр эрхлэлт, гарааны бизнесийг дэмжихэд хамтран ажиллах Санамж бичиг байгууллаа.

Мөн хотын соёлыг түгээн дэлгэрүүлэх, гэмт хэрэг, зөрчлөөс урьдчилан сэргийлэх, байгаль орчин, нийгмийн тогтвортой хөгжлийг дэмжихэд анхааран ажиллах юм. Энэ хүрээнд НЗДТГ-ын даргын албан үүргийг түр орлон гүйцэтгэгч И.Баатархүү, “Премиум Групп” ХХК-ийн гүйцэтгэх захирал А.Ганболд нар хамтын ажиллагааны Санамж бичигт гарын үсэг зурлаа.

НЗДТГ-ын даргын албан үүргийг түр орлон гүйцэтгэгч И.Баатархүү “Санамж бичгийн хүрээнд CU сүлжээ дэлгүүртэй зургаан чиглэлд хамтарч ажиллахаар боллоо. Тус дэлгүүр нь Улаанбаатарт олон салбар дэлгүүрээр үйлчилгээ үзүүлж, шинэ үйлчилгээний соёлыг нэвтрүүлсэн. Хүнсний аюулгүй байдлыг хангаж, нийгмийн асуудалд хариуцлагатай хандан ажиллаж байгаа. Мөн иргэдийн ая тухтай үйлчлүүлэх боломжийг нээж, стандарт жишгийг тогтоосон. Нийгмийн хариуцлагын хүрээнд стандарт шаардлагыг шинэ түвшинд гаргасан, нийслэлийн иргэдэд чанартай, аюулгүй бүтээгдэхүүн, үйлчилгээг үзүүлж байгаад талархаж байна” хэмээлээ.

“Премиум Групп” ХХК-ийн гүйцэтгэх захирал А.Ганболд “Хүнсний аюулгүй байдлыг хангах, гэмт хэрэгтэй тэмцэх, ажлын байраар хангах, гарааны бизнесийг дэмжих зэрэг чиглэлд нийслэлтэй хамтарч ажиллана. Манай компанийн хэрэгжүүлж байгаа олон улсын туршлагыг Улаанбаатар хотын хэмжээнд түгээн дэлгэрүүлэх, сурталчлах, залуучуудыг ажлын байраар хангахын зэрэгцээ сургах, гэмт хэргээс сэргийлэх ажлын хүрээнд сурталчилгаа хийх зэрэг олон талт ажлыг хамтран хэрэгжүүлэх юм. Тухайлбал, 21 нас хүрээгүй хүнд архи, дарс, тамхи зарж болохгүйг сүлжээ дэлгүүрээр дамжуулан сурталчилна. CU брэнд 270 орчим сүлжээ дэлгүүртэй үйл ажиллагаа явуулж байгаа. Цаашид энэ тоо өснө. Манайд бүтээгдэхүүн нийлүүлдэг жижиг, дунд үйлдвэр, үйлчилгээ эрхлэгчид, аж ахуйн нэгжүүд олон бий. Тэдгээрийг дэмжих, стандартад нийцүүлэх, борлуулалт хийж өгснөөр тухайн аж ахуйн нэгжийг хөгжүүлэх зэргээр хамтдаа хөгжих боломжийг зайлшгүй хангана” гэв.

Нийслэлийн хэмжээнд 43.236 аж ахуйн нэгж жижиг, дунд үйлдвэр, үйлчилгээ /ЖДҮҮ/ эрхэлж буй нь улсын хэмжээнд ЖДҮҮ эрхлэгчдийн 68 хувийг бүрдүүлж байна. Улсын хэмжээний хөдөлмөрийн зах зээлийн 70 хувийг ЖДҮҮ эрхлэгчид эзэлдэг ч экспортын ердөө 2.4 хувийг, ДНБ-ий 18.3 хувийг бүрдүүлдэг. Иймд тус Санамж бичгийг байгуулснаар ЖДҮҮ эрхлэгчдийг дэмжих, худалдан авалт, хоол, хүнсний ногооны үйлдвэрлэл, логистик, маркетинг, үйлчилгээний тэргүүний туршлага, ноу-хауг түгээх зэрэг олон ач холбогдолтой юм.

Түүнчлэн ЖДҮҮ эрхлэгчдийн үйлдвэрлэсэн хүнсний болон монгол уламжлал, соёлыг агуулсан бараа бүтээгдэхүүнийг гадаад улсад байгаа CU салбар дэлгүүрээр худалдаалж зах зээлд гаргахад дэмжлэг үзүүлж, хамтран ажиллах талаар Санамж бичигт тусгажээ.

Санамж бичгийн хүрээнд хамтран ажиллах чиглэл, агуулгыг онцолбол:

Нийслэлийн хүн амыг эрүүл хүнсээр хангах чиглэлд

-Хүнсний аюулгүй байдал, эрүүл ахуйн дэлхийн стандартыг хангах өдөр тутмын хүнсний бүтээгдэхүүн, үйлчилгээг дэлгэрүүлэх; импортын бүтээгдэхүүнийг орлох олон улсын хүнсний аюулгүй байдлын шаардлагыг хангасан, эрүүл, баталгаатай, чанартай хүнсээр нийслэлийн иргэдийг хангах

-Нийслэл дэх хүнсний хангамжийн баталгаат байдлыг нэмэгдүүлэх; Хүнсний аюулгүй байдал, эрүүл мэнд, эрүүл хооллолтын талаарх нийслэлийн хүн амын мэдлэгийг дээшлүүлэх, боловсролыг түгээж ажиллах

Хотын соёлыг түгээн дэлгэрүүлэх чиглэлд

-Нийтийн ариун цэврийн өрөөний хүртээмжийг нэмэгдүүлэх

-Төрийн болон нийслэлийн зарим үйлчилгээг CU дэлгүүрээр дамжуулан иргэдэд хүргэх

-Нийслэлийн хөгжлийн бодлого, төлөвлөлтөд залуучуудын оролцоог дэмжих

Ажлын байрыг нэмэгдүүлэх, хөдөлмөр эрхлэлтийг дэмжих чиглэлд

-Орон нутгаас нийслэлд суурьшиж буй иргэдэд үйлдвэрлэл, үйлчилгээний салбарт ажил, хөдөлмөр эрхлэхэд шаардагдах, бизнес эрхлэгчдийн шаардлагад нийцсэн мэдлэг, чадвар, дадлыг эзэмшүүлэх

-Ажлын бүтэн бус цагийн хөдөлмөр эрхлэх боломжийг нэмэгдүүлэх

Гэмт хэрэг, зөрчлөөс урьдчилан сэргийлэх чиглэлд

-Согтууруулах ундаа, утаат болон электрон тамхийг хуульд заасан насанд хүрээгүй хүн худалдан авахаас сэргийлэх; иргэдэд гэмт, хэрэг зөрчлөөс урьдчилан сэргийлэх чиглэлээр эерэг нөлөөллийн контент бэлтгэж түгээх

Байгаль орчин, нийгмийн тогтвортой хөгжлийг дэмжих чиглэлд

-Байгалийн нөөцийг үр ашигтай зарцуулах, хариуцлагатай хэрэглээг бий болгох, хог хаягдлыг дахин боловсруулах, ангилан ялгах дадал хэвшлийг суулгах үйл ажиллагаанд дэмжлэг үзүүлэх

Гарааны бизнесийг дэмжих чиглэлд

-“Премиум Групп” (түүний охин, харьяа компаниуд)-ийн худалдан авалт, хоол, хүнсний ногооны үйлдвэрлэл, логистик, маркетинг, үйлчилгээний тэргүүний туршлага, ноу-хауг нийслэлийн жижиг, дунд үйлдвэрлэгчдэд түгээх

-CU дэлгүүрүүдийн эцсийн хэрэглэгч хэрэглэх хүнс, хүнсний бус бүтээгдэхүүн болон төрөл бүрийн үйлчилгээг нийлүүлэх гарааны бизнесүүдийн чадавхыг нэмэгдүүлэх

-CU дэлгүүрүүдийн дэд бүтцийг байгуулах, үйлчилгээний тасалдалгүй байдлыг хангахтай холбоотой үйлчилгээ үзүүлэх гарааны бизнесүүдийн чадавхыг нэмэгдүүлэх зэрэг багтжээ.