/2021.08.20/: "КОВИД-19" ХАЛДВАРЫН ҮЕД ЦЭЦЭРЛЭГИЙН СУРГАЛТ ЗОХИОН БАЙГУУЛАХАД МӨРДӨХ ТҮР ЖУРМЫГ БАГШ НАРТ ТАНИЛЦУУЛЛАА
“2021-2022 оны хичээлийн жилийн бэлтгэл ажил, анхаарах асуудал” сэдэвт цахим сургалтыг Боловсрол, шинжлэх ухааны яамны Сургуулийн өмнөх боловсролын газраас НҮБ-ын Хүүхдийн Сангийн дэмжлэгтэйгээр зохион байгууллаа.
2 өдрийн цахим сургалтад 21 аймаг, 9 дүүргийн Боловсролын газар хэлтсийн мэргэжилтэн, төрийн болон төрийн бус өмчийн цэцэрлэгийн нийт 1576 удирдах ажилтан, багш нар хамрагдаж Боловсрол, шинжлэх ухааны сайд, Эрүүл мэндийн сайдын хамтран баталсан “Коронавируст халдварын үед цэцэрлэгийн сургалт үйл ажиллагааг зохион байгуулахад мөрдөх түр журам”-тай танилцлаа.
- Короновируст халдварын үед боловсролын үйл ажиллагааг танхимаар явуулахдаа
- Нэг ангид 20+5 суралцагчтай байх
- Цэцэрлэгийн танхимын сургалтад хамрагдах хүүхдийг эцэг эх, асран хамгаалагчийн саналыг харгалзан хүлээн авах
- Дотоод орчинд багш, удирдлагууд амны хаалт хэрэглэх
- Хүүхдэд амны хаалт зүүлгэхгүй байх
- Хүүхэд, багш, ажилтан, эцэг эх, асран хамгаалагчийг хамруулсан уралдаан , тэмцээн зохион байгуулахгүй
- Ариун цэврийн хэрэгсэл, хичээлийн хэрэглэгдэхүүнийг 3 сар хэрэглэх хэмжээгээр бэлтгүүлэн авах
- Хүүхдийн гарыг халдваргүйжүүлэх уусмалаар ариутгахгүй, зөвхөн савандаж угаана
зэрэг зохицуулалтууд түр журамд тусгагдсан байна.
ЭМЯ-наас өгч буй мэдээллээр 2021.08.18-ны өдрийн байдлаар улсын хэмжээнд короновируст халдвараар өвчилсан 0-18 насны хүүхдийн 23.2% -ийг 0-4 насны хүүхэд , 44.1% -ийг 5-11 насны хүүхэд эзэлж байна.
Эх сурвалж: БШУЯ
