/2022.09.19/: 2022 оны есдүгээр сарын 05-17-ны өдрүүдэд Румын Улсын Мамаиа хотноо өсвөрийн шатарчдын 14, 16, 18 насны ангиллын ДАШТ зохион байгуулагдлаа.

Охидын 15-16 насны ангилалд дэлхийн шатрын холбооны мастер Даваахүүгийн Мөнхзул 11 өргөөс 8.5 оноо авч хожигдолгүй түрүүлжээ. Тэрээр найман жилийн өмнө 2014 онд ӨАБНУ-ын Дурбан хотноо зохиогдсон өсвөрийн шатарчдын ДАШТ-ийн 8 хүртэлх насны ангилалд тэргүүн байр эзэлж анхны цомоо өргөж байв. Одоо түүнийг дэлхийн хошой аварга хэмээн зүй ёсоор нэрлэнэ.

Дэлхийн шатрын холбооны олон улсын мастер /WIM/ цолны болзол хангасан Д.Мөнхзул нь дараах амжилтыг үзүүлээд байгаа юм.

• 2014, 2022 оны Өсвөрийн шатарчдын ДАШТ-ийн аварга
• 2017, 2018 оны Сурагчдын ДАШТ-ийн аварга
• 2014, 2016 оны Өсвөрийн шатарчдын Ази тивийн аварга
• 2015, 2019 оны Сурагчдын ДАШТ-ийн Мөнгөн медаль
• 2022 оны Дэлхийн шатрын 44-р олимпиадад Монгол Улсын шигшээ багийн нөөц тоглогч