/2024.01.17/: Өчигдөр хөрш Иран Пакистанд гэнэтийн цохилтын улмаас хоёр хүүхэд амиа алдаж, гурван хүүхэд шархадсан гэж Пакистан мэдэгдэв.
Иран дайралтын талаар "Жайш аль-Адл" зэвсэгт бүлэглэлтэй холбоотой хоёр баазыг онилсон гэж мэдэгдсэн ч Пакистан үүнийг няцааж, "ноцтой үр дагаварт хүргэж болзошгүй хууль бус үйлдэл" гэж мэдэгдэв.
Пакистан бол сүүлийн хэдэн өдрийн дотор Ираны халдлагад өртсөн Ирак, Сирийн дараа орсон гурав дахь орон болж байна.
Урьд өмнө нь Иран Пакистан руу пуужингаар довтолж байгаагүй юм. Өчигдрийн довтолгоо хоёр улстай хиллэдэг баруун өмнөд хэсэгт орших Белужистан мужийн нэгэн тосгонд болсон байна.
Пакистаны Гадаад хэргийн яам мэдэгдэлдээ "Иран өөрийн агаарын орон зайг үндэслэлгүйгээр зөрчсөн"-ийг хатуу зэмлэн буруушаав.
Пакистан улс нийслэл Тегеран дахь Ираны Гадаад хэргийн яамны албан тушаалтанд эсэргүүцэл илэрхийлж, "Пакистаны тусгаар тогтнолыг илтэд зөрчиж байгаа бөгөөд үр дагаврын хариуцлагыг Иран хүлээх болно" гэв.
Иран даваа гарагийн орой Иракийн хойд хэсгийн Эрбил хотын бай руу баллистик пуужингаар цохилт өгснийг АНУ-ын зүгээс буруушаагаад байсан юм.
Иран улс илүү өргөн хүрээний мөргөлдөөнд оролцохыг хүсэхгүй байгаагаа мэдэгдсэн ч "эсэргүүцлийн тэнхлэг" гэгдэх бүлэглэлүүд Палестинчуудтай эв нэгдлээ илэрхийлэхийн тулд Израиль болон түүний холбоотнууд руу дайралт хийж байна.
Пакистан, Иран улсууд хүн ам сийрэг суурьшсан бүс нутагт олон арван жилийн турш Жейш аль-Адл зэрэг зэвсэгт салан тусгаарлагчдын бүлэглэлтэй тулалдсаар ирсэн.
Ойролцоогоор 900 км үргэлжилдэг тэдний хамтарсан хилийн хоёр талын аюулгүй байдал нь хоёр улсын засгийн газрын хувьд удаан хугацааны туршид санаа зовоосон асуудал байсаар ирсэн юм.
Эх сурвалж: CNN
