/2023.10.13/: Францын Засгийн газар Палестиныг дэмжсэн жагсаал цуглаан хийхийг хориглосон байна.
Дотоод хэргийн сайд Жеральд Дарманин дүрэм зөрчсөн гадаадын иргэдийг "системтэй" албадан гаргана гэж анхааруулсан бол Ерөнхийлөгч Эммануэль Макрон эв нэгдэлтэй байхыг уриалав.
Хэдийгээр хориг тавьсан ч Палестиныг дэмжигч олон тооны жагсагчид пүрэв гарагт Парис хотноо эсэргүүцлээ илэрхийлжээ.
Цагдаа нар Place de la République цэнгэлдэх хүрээлэнд болсон 3000 гаруй хүнтэй жагсаалыг тараахын тулд усан буу ашигласан бөгөөд уг жагсаалд оролцсон 10 хүнийг баривчилжээ. Жагсагчид "Израиль алуурчин", "Палестин ялна" гэж хашгирч, Палестины туг далбааг намируулж байжээ.
Хориг тавихыг тушаасан ноён Дарманин хоригийг эсэргүүцсэн хүмүүсийг "нийгмийн дэг журмыг зөрчих магадлалтай тул баривчлах ёстой" гэж мэдэгджээ.
Гэвч Палестиныг дэмжигч бүлгүүд үзэл бодлоо илэрхийлэх эрх чөлөөнд заналхийлэх эрсдэлтэй гэж үзэж, Палестины ард түмнийг дэмжсэн жагсаал цуглаанаа үргэлжлүүлнэ гэдгээ амлалаа.
Жагсаалд оролцсон Шарлотт Вотиер Ройтерс агентлагт өгсөн ярилцлагадаа “Бид иргэний хуультай, байр сууриа илэрхийлэх, жагсаал хийх эрхтэй улсад амьдарч байна. Нэг талыг нь хориглож, нөгөө талд нь зөвшөөрөл олгох нь шударга бус юм" гэжээ.
Үүний зэрэгцээ Германы нийслэл Берлин хотын цагдаа нар еврейн эсрэг үзэл, хүчирхийллийг нэмэгдүүлэх эрсдэлтэй хэмээн үзэж, Палестиныг дэмжсэн жагсаал цуглаан хийхийг хориглосон байна.
Пүрэв гарагт Потсдамер Платцыг орхих тушаалыг 60 орчим жагсагч биелүүлсэн гэж цагдаа нар мэдэгдэв.
Ерөнхийлөгч Макрон видео мэдэгдэлдээ Францын ард түмнийг эв нэгдэлтэй байхыг уриалж, "Олон улсын хуваагдал дээр үндэсний хагарал нэмж болохгүй" гэж хэлэв.
Тэрээр "Хамас"-ыг "Израилийн ард түмний үхлийг хүсдэг террорист байгууллага" гэж тодорхойлсон.
Өнгөрсөн бямба гарагт Хамас бүлэглэлийн Израиль руу хийсэн дайралтад Францын 13 орчим иргэн амиа алдсан нь батлагдсан юм.
Ерөнхийлөгч Макрон Францын 17 иргэн сураггүй алга болсон бөгөөд Газын зурваст Хамас бүлэглэлийн барьцаанд байгаа хүмүүсийн дунд байх магадлалтай гэж мэдэгдээд "Франц тэднийг эх оронд нь авчрахын тулд Израил болон манай түншүүдийн хамт чадах бүхнээ хийж байна" гэж мэдэгдэв.
Сураггүй алга болсон хүмүүсийн дунд дөрвөн хүүхэд байгаа аж.
Тэрээр хэлэхдээ, Израиль террористуудыг устгаснаар өөрийгөө хамгаалах эрхтэй боловч "ардчилсан орнуудын үүрэг учраас энгийн иргэдийн амь насыг хамгаалах ёстой" гэжээ.
“Терроризмд үзүүлэх цорын ганц арга зам бол хүчтэй боловч шударга байх явдал юм.
Францад бараг 500,000 хүнтэй еврей нийгэмлэг байдаг нь Европ дахь хамгийн томд тооцогддог. Францын лалын шашинтнууд Европын хамгийн томд тооцогддог буюу таван сая орчим хүнтэй юм.
Эх сурвалж: ВВС
