/2023.07.24/: Элон Маск ням гарагт өөрийн албан ёсны цахим хуудаснаа Twitter логог "X" болгон өөрчилж, шувууны лого удахгүй алга болно гэж жиргэжээ.

Маск хэд хэдэн жиргээндээ: "Удахгүй бид твиттер брэндтэй, аажмаар бүх шувуудтай салах ёс гүйцэтгэх болно" гэжээ.

Тэрээр бас нэг жиргээндээ твиттерийн үндсэн өнгийг хар өнгө болгох талаар мөн дурссан байна.

Дэлхийн хамгийн баян хүмүүсийн нэг Маск нэгэн цагт SpaceX, Tesla компаниудаар дамжуулан пуужин хөөргөж, цахилгаан машин үйлдвэрлэдгээрээ алдартай байсан бол одоо хувийн твиттер хуудсандаа хуйвалдааны онолын талаар ярилцаж, олон нийтийн дунд маргаан өрнүүлдэг нэгэн болжээ.

Тэрээр Твиттер дампуурлаа зарлах эрсдэлд орж болзошгүйг удаа дараа анхааруулж байсан юм. Энэ сард тэрээр сурталчилгааны орлого 50 хувиар буурч, өрийн дарамтаас үүдэн платформ нь ашиггүй ажилласан хэвээр байгааг олон нийтэд дэлгэсэн юм.

Эх сурвалж: CNN