/2023.06.29/: Вагнерын бослоготой холбогдуулан Украин дахь Оросын цэргийн ажиллагааны командлагчийн орлогч генерал Сергей Суровикиныг баривчилсан тухай Москва Таймс сонин болон Оросын армийн эх сурвалжаас иш татан мэдээлэв.
Оросын хэвлэл мэдээллийн хэрэгслээр "Генерал Армагеддон" хэмээн хочилдог Суровикин бол Чечень болон Сири дэх Оросын дайнд оролцож явсан ахмад дайчин бөгөөд ОХУ-ын ерөнхийлөгч Владимир Путины шагналаар шагнуулж байсан юм.
Суровикиныг "бослогод оролцсон" гэж буруутгасан байсан.
Суровикиныг саатуулсан тухай мэдээлэлд ОХУ-ын Батлан хамгаалах яам хараахан тайлбар хийгээгүй байна гэж тус сонинд бичжээ.
Вагнерын арми Москвад нэвтэрч, тус улсын цэргийн дээд удирдагчдыг баривчлах гэж оролдсоны дараа Оросын цэргийн командлал "томоохон хэмжээний цэвэрлэгээ" хийж байна гэж Оросын алдартай цэргийн блог сайт мэдээлсэн байна.
Эх сурвалж: Aljazeera
