/2023.05.05/: Пакистаны хойд нутгийн Хайбер Пахтунква мужийн сургуульд үл таних зэвсэгт этгээд халдлага үйлдэсний улмаас сургуулийн найман ажилтан амиа алдаж, хоёр хүн шархаджээ.

Дүүргийн цагдаагийн офицер Мухаммед Имраны хэлснээр нас барсан хүмүүсийн дунд сургуулийн таван багш, сургуулийн гурван туслах ажилтан байгаа аж. Амиа алдсан болон шархадсан хүмүүс бүгд эрчүүд байна.

Хэрэг пүрэв гарагийн үд дунд болсон бөгөөд мөрдөн байцаалтын ажиллагаа явагдаж байгаа аж. Халдлагад өртсөн хүмүүс бүгд Исламын шиа урсгалын гишүүд байсан тул цагдаа нар уг халдлагыг шашны бүлэглэл хоорондын хэрэг гэж сэжиглэж байна гэв.

Халдлага болсон бүс нутаг нь лалын шашны суннит болон шиа урсгалуудын хооронд мөргөлдөөн байнга гардгаараа алдартай.

Эх сурвалж: CNN