/2021.08.13/ Өчигдөр цахим орчинд арван мянган төгрөгийн мөнгөн дэвсгэрт дээр Ерөнхийлөгч У.Хүрэлсүхийн зураг хэвлэгдсэн талаар мэдээлэл түгээд буй.

Иргэдийн итгэж ядан цахим орчинд шуугиж байгаа дээрх зураг нь Ардын хувьсгалын 100 жилийн ойд зориулсан дурсгалын 10.000 төгрөгийн мөнгөн дэвсгэрт юм. Дээрх зураг нь засаж янзалсан зураг бол доорх загвар нь одоогийн гүйлгээнд байгаа тусгай загварын мөнгөн дэвсгэрт болно.

Тус мөнгөн дэвсгэртийн давуу тал нь:

• Сүүлийн үеийн шинэ технологиор бүтээгдсэн хамгаалалтын онцлог элементүүдээр баяжигдсан гэдгээрээ онцлогтой.

• Дэвсгэртийн нүүрэн талд байрлуулсан Ардын хувьсгалын 100 жилийн ойн лого болон баруун, доод хэсэг дэх морьтон баатар нь 3D хэмжээст, өнгө нь хувирч солонгорох хамгаалалтын шинэ технологи юм.
• Мөн баруун, зүүн ирмэгт харааны бэрхшээлтэй иргэдэд зориулсан 7 ширхэг ташуу зураасан товгор таних тэмдэгтэй.

Мөнгөн дэвсгэртийн доор байрладаг морьтон баатрын зургийг Ерөнхийлөгчийн зургаар орлуулан засаж янзалсан тэрхүү этгээд иргэдийг нэг сайн "молиго үмхүүлээд" авлаа даа.