/2021.08.13/ Таван толгой түлшний үйлдвэрийн өвөлжилтийн бэлтгэл, засвар шинэчлэлийн ажил 75 хувьтай байна гэж БОАЖЯ-аас мэдээллээ.

Орчний бохирдлыг бууруулах зорилгоор "Таван толгой түлш" ХХК-ийн баруун бүсийн үйлдвэрт 9 бутлуур, туслах 15 тоног төхөөрөмж шинээр суурилуулахаар бэлтэлээ хангасан байна.

Мөн энэ хүрээнд шахмал түлшний үйлдвэрийн гадна талбайд 10 орчим метрийн өндөр зориулалтын хаалт босгоод байгаа аж. Ингэснээр хамрах талбайн тоосжилт 75 хувиар буурна гэж тооцоолжээ.

Түүнчлэн түлшний үйлдвэрээс үүсэх тоосжилтыг 4 дахин бууруулахаар техникийн шинэчлэл хийхээс гадна бутлуурыг газар доор байрлуулж байгаа юм байна.

Тус үйлдвэрийг энэ оны хоёрдугаар сард Налайх руу нүүлгэх шийдвэрийг гаргаад байсан. Гэхдээ уг асуудлыг тодруулахаар биднийг очиход нүүлгэлтийн ажил хийж байгаа зүйл ажиглагдаагүй юм. Энэ талаарх сурвалжилгыг манай сайт өмнө нь хүргэсэн билээ.

Эх сурвалж: БОАЖЯ