/2023.01.25/: Цагаан давааны хогийн төвлөрсөн цэг 90 га талбайг эзэлдэг бөгөөд 22 га талбайг хог хаях зориулалтаар ашиглан, өдөрт 1.5-2 тонн хог ирдэг.

8 га талбайд ландфилл технологийн дагуу хогийг устгаж биологийн нөхөн сэргээлтийг хийсэн байна. Энд 5 метр урт, 1 метр диаметртэй, агаар сэлгэх боломжтой 33 метан хий зайлуулах бетонон хоолойг суурилуулжээ. Нөхөн сэргээсэн талбайг хогийн цэгээс тусгаарлахын тулд 3 метр өндөр, 360 метр урт төмөр торон хашааг барьсан байна.

Хогийн цэгийг тойруулан ландфилл хийсэн хэсгүүдэд хог дахин боловсруулах жижиг, дунд үйлдвэр байгуулах төлөвлөгөө гаргажээ. Хувийн байгууллагуудтай хамтран Цагаан давааны хогийн цэгт хог ангилан, ялгах өндөр хүчин чадалтай автоматжуулсан үйлдвэр барьж байгаа бөгөөд тус үйлдвэрийг энэ онд ашиглалтад оруулах аж.

Улаанбаатар хотын Захирагчийн ажлын албанаас цаашид хогийг дахин боловсруулдаг үйлдвэрүүдийг хөгжүүлэхээр төлөвлөж байгаа бөгөөд иргэдийг хогоо ангилж ялгадаг ажлыг эхлүүлэхээр Төрийн бус байгууллагуудтай хамтран ажиллаж байна. Хог цэвэрлэгээнд шаардлагатай, хүчин чадал бүхий техникийн шинэчлэлүүд мөн хийгдэж байна.

Эх сурвалж: УБХЗАА