/2022.10.24/: Хүн амын дунд зонхилон тохиолддог, нас баралтын хувь өндөртэй зүрх судас, чихрийн шижин, уушгины эмгэг болон хавдрын үед хэрэглэгдэх 16 төрлийн эмийг өнөөдрөөс эхлээд үнэ төлбөргүй олгох нөхцөл бүрдлээ.
Эдгээр 16 ерөнхий нэршлийн эм нь Эрүүл мэндийн сайдын 2020 оны А/625 дугаар тушаалаар баталсан “Зайлшгүй шаардлагатай эмийн 9 дэх жагсаалт”-д багтсан юм.
Эхний татан авалтаар 485,331 хайрцаг эм ирсэн бөгөөд цаашид хүн амын хэрэгцээ шаардлагыг үндэслэн эмийн тоо, төрлийг нэмэгдүүлж, улс орон даяар бүх эмийн сангаар олгох бэлтгэлийг хангаж байна.
Дээрх эмийг хамгийн бага өртгөөр зах зээлд нийлүүлж, санхүүгийн дарамтаас шалтгаалан эмээ авч чадахгүй байгаа даатгуулагч-иргэдэд Эрүүл мэндийн даатгалын сангаас 100 хувь хариуцаж олгох бөгөөд иргэд зөвхөн ЭМД-ын шимтгэлээ бүрэн төлсөн байх ёстой юм.
Халдварт бус өвчлөл болон хавдрын үеийн эм зүйн тусламж үйлчилгээний чанар, хүртээмжийг сайжруулах зорилгоор Эрүүл мэндийн даатгалын ерөнхий газар нь 2021 оноос Швейцарын Холбооны Улсын “Новартис Глобал” эрүүл мэндийн байгууллагатай гэрээ байгуулан хамтран ажиллаж байна.
Өнгөрсөн 7 хоногт ЭМЯ-ны дэргэдэх хүний эмийн зөвлөл хуралдаж, "Новартис аксес" хөтөлбөрийн хүрээнд нэн шаардлагатай байгаа эмийн жагсаалтад орсон олон улсын нэр хүндтэй компаний 16 төрлийн эмийг Монгол Улсын эмийн жагсаалтад бүртгэснээр ийнхүү ажил хэрэг болж байна.
Эмийн хүртээмжийн хөтөлбөрийг хэрэгжүүлж буй Новартис компани нь Швейцарын холбооны улсад төвтэй дэлхийн эрүүл мэндийн өндөр чанартай эм үйлдвэрлэгч байгууллага юм. Өдгөө Африк, Ази, зүүн Европ, Латин Америкийн улс орон руу экспорт хийж, өвчиндөө шаналж яваа олон мянган даатгуулагч-иргэдийн амьдралын чанарыг сайжруулахад чиглэсэн хөтөлбөрийг улс орнуудад хэрэгжүүлж ажилладаг аж.
Тус хөтөлбөрийн хүрээнд Монгол Улсын эмийн бүртгэлд шинээр нэмэгдсэн 16 эмийн жагсаалт
| Д/Д | Эмийн худалдааны нэр | Олон Улсын нэршил | Тун хэмжээ | Хэлбэр |
| 1 | Bisoprolol fumarate | Bisoprolol fumarate | 2.5 мг №30 | Film coated tablets |
| 2 | Bisoprolol fumarate | Bisoprolol fumarate | 5 мг №100 | Film coated tablets |
| 3 | Bisoprolol fumarate | Bisoprolol fumarate | 10 мг №100 | Film coated tablets |
| 4 | Amlodipine | Amlodipine | 5 мг №30 | Tablets |
| 5 | Amlodipine | Amlodipine | 10 мг №100 | Tablets |
| 6 | Ramipril | Ramipril | 10 мг №100 | Tablets |
| 7 | Ramipril | Ramipril | 5 мг №20 | Tablets |
| 8 | Tamoxifen | Tamoxifen | 20 мг №30 | Tablets |
| 9 | Furosemide | Furosemide | 40 мг №100 | Tablets |
| 10 | Anastrazole | Anastrazole | 1 мг №30 | Film coated tablets |
| 11 | Valsartan | Valsartan | 80 мг №28 | Film coated tablets |
| 12 | Valsartan | Valsartan | 160 мг №28 | Film coated tablets |
| 13 | Letrosole | Letrosole | 2,5 мг №30 | Film coated tablets |
| 14 | Salbutamol | Salbutamol | 100 мкг/доза | Inhaler |
| 15 | Hydrochlorthiaside | Hydrochlorthiaside | 25 мг №100 | Tablets |
| 16 | Amoxicillin | Amoxicillin | 250 мг №100 | Dispersable tablets |
Эх сурвалж: ЭМЯ
