/2022.10.24/: Хойд Солонгосын хөлөг онгоц өнөөдөр Шар тэнгисийн хойд хилийг давсан тул Өмнөд Солонгосын арми гал нээсэн бөгөөд Хойдууд хариуд нь "сануулах гал" нээсэн байна.

Хойд Солонгосын худалдааны хөлөг онгоц өглөөний 03:42 цагт фронтын Баеннёнг арлын ойролцоох усан хилийн шугам зөрчсөн бөгөөд Өмнөдийн Тэнгисийн цэргийн хүчин анхааруулах буудлага хийсний дараа хойд зүг рүү ухарсан гэж Өмнөдийн нэгдсэн штабын дарга нар мэдэгдэв.

Хойд Солонгосын ардын армийн жанжин штабын хэвлэлийн төлөөлөгчийн мэдээлснээр Өмнөд Солонгосын хөлөг онгоц 03:50 цагт БНАСАУ-ын армийн хяналтад байдаг Цэргийн хилийн шугам руу 2.5-5 километрийн зайд нэвтэрч, үл мэдэгдэх хөлөг онгоцонд цохилт өгсөн гэж мэдэгдэв.

Хилийн хурцадмал байдлыг намжаах зорилготойгоор есдүгээр сарын 19-ний өдөр хийгдсэн хоёр талын цэргийн иж бүрэн хэлэлцээрийг зөрчиж, өглөөний 5:14 цагийн орчимд Умардаас их буугаар 10 удаа буудсаныг илрүүлсэн гэж Өмнөдийн JCS мэдэгдлээ. JCS үүнийг зөвхөн хойгийн төдийгүй олон улсын хамтын нийгэмлэгийн энх тайван, тогтвортой байдалд хор хөнөөл учруулж буй өдөөн хатгалга гэж нэрлэжээ.

Хоёр Солонгосын хооронд сэрэмжлүүлгийн гал нээсэн явдал нь Хойд Солонгосын баллистик пуужингийн туршилт, их буугаар буудах зэрэг өдөөн хатгалга үргэлжилсээр байгаа хурцадмал байдлын үед болж байна.

Өнгөрсөн амралтын өдөр Хятадын гол намын их хурал өндөрлөхөд Хойд Солонгос цөмийн туршилт хийж магадгүй гэсэн таамаг газар авч байна.

1950-1953 оны Солонгосын дайны төгсгөлд АНУ тэргүүтэй НҮБ-ын командлалаар зурсан NLL нь хоёр Солонгосын хооронд де-факто далайн хилийн үүрэг гүйцэтгэдэг. Пхеньян уг хилийн зурвасыг хүлээн зөвшөөрдөггүй бөгөөд хоёр тал тэнд 1999, 2002, 2009 онд цуст тулаан хийж байжээ.

Эх сурвалж: Koreaherald