/2022.10.20/ Монгол Улс дахь Америкийн Нэгдсэн Улсын Элчин сайд М.Клеческий нутаг буцаж, түүний албыг үргэлжлүүлэх Р.Буанган Улаанбаатар хотноо ирлээ.
Тэрбээр "Сайн байцгаана уу! Би Улаанбаатар хотод өнөө өглөө ирлээ. Монгол орон өнөөдрөөс миний гэр болж байгаад сэтгэл догдолж байна. Та бүхэнтэй үүгээр болон биечлэн уулзахыг тэсэн ядан хүлээж байна. Сайхан Монгол оронд АНУ-ыг төлөөлж ажиллах нь нэр төрийн хэрэг юм" гэжээ.
Hello everyone! I just landed in Ulaanbaatar this morning and am excited to arrive in Mongolia, my new home. Looking forward to engaging with you all here and in person. It is an honor to work represent the USA 🇺🇸 here in your great and beautiful country 🇲🇳 pic.twitter.com/ABBnn3rJhf
— Ambassador Richard Buangan (@USAmbMongolia) October 20, 2022
Ричард Буанган:
Америкийн Нэгдсэн Улсаас Монгол Улсад суугаа Элчин сайд Ричард Буанган 1999 оноос АНУ-ын Төрийн департаментад ажиллаж байгаа бөгөөд Гадаад харилцааны албаны ахлах албан тушаалтан буюу Элчин зөвлөхийн хэргэм зэрэгтэй.
Тэрээр Монголд ирэхээсээ өмнө Төрийн департаментын Дэлхий дахины олон нийттэй харилцах асуудал эрхэлсэн товчоонд Туслах төрийн нарийн бичгийн даргын орлогчоор, түүнээс өмнө Зүүн Ази, Номхон далайн хэрэг эрхлэх товчоонд Туслах төрийн нарийн бичгийн даргын орлогч, мөн Төрийн нарийн бичгийн дарга Майкл Помпеогийн Гүйцэтгэх туслахаар ажиллаж байв.
Элчин сайд Буанган өмнө нь Иерусалем, Бээжин, Парис, Абиджан зэрэг хотуудад томилогдон ажилласнаас гадна Вашингтон хотноо Төрийн департаментын Олон нийттэй харилцах асуудал эрхэлсэн товчоонд Олон улсын хэвлэл мэдээллийн газрын захирал, Цахим харилцааны албаны захирал зэрэг албан тушаалууд хашиж, Гүйцэтгэх нарийн бичгийн дарга нарын ажлын албанд ажилласан туршлагатай дипломатч бөгөөд Төрийн департаментаас олон удаа шагнал, өргөмжлөл хүртсэн байна.
Ричард Калифорни мужийн Сан Диего хотод төрж өсөөд Техас мужийн Остин хотын Сэйнт Эдвардын их сургуулиас Улс төрийн шинжлэх ухаан, эдийн засгийн бакалаврын зэрэг хүртжээ. Тэрээр франц, испани, мандарин хятад хэлээр ярьдаг.
