/2022.08.26/: ОХУ-ын Ерөнхийлөгч ойрын саруудад тус улсын зэвсэгт хүчнийг 137,000 цэргийн албан хаагчаар нэмэгдүүлэх тухай зарлигт гарын үсэг зурлаа.

Барууны албаныхны мэдээлснээр, зургаан сарын өмнө Орос Украинд цөмрөн орсноос хойш 70-80 мянган цэрэг амь үрэгдэж, шархадсан байна.

Бүртгэлийн ажилтнууд шоронгуудад очиж, хоригдлуудад эрх чөлөө, мөнгө амлаж байсан гэх мэдээлэл ч бий.

Их Британийн Батлан хамгаалах яам хоёр долоо хоногийн өмнө хийсэн мэдэгдэлдээ Оросын хэд хэдэн бүс нутагт сайн дурын батальон байгуулж байгаа нь шинэ армийн корпусын нэг хэсэг болох магадлалтай гэж мэдэгджээ.

Гэхдээ Украинд сайн дураараа байлдах хүсэл эрмэлзэлтэй хүн маш бага байгаа нь шаардлагатай тооны цэргийг олоход хүндрэл учруулах нь ойлгомжтой.

Орос өнгөрсөн хоёрдугаар сард Украинд довтлохдоо богино, шийдэмгий кампанит ажил хийнэ гэж амлаж байсан ч Украины ширүүн эсэргүүцэл нь ахиц дэвшлийг нь зогсоож сунжирсан дайн болгон хувиргасан юм. Сүүлийн хэдэн долоо хоногт фронтын шугам бараг хөдөлсөнгүй.

Сайн дурынхан уу, хугацаат цэргийн алба хаагчид уу?

Сайн дурынхныг олноор элсүүлэх үү, цэрэг татлагыг өргөжүүлэх үү гэдэг нь тодорхойгүй байна.

Одоогийн байдлаар 18-27 насны орос эрчүүдийг дуудаж байгаа боловч олонх нь эмнэлгийн чөлөөлөлт эсвэл дээд сургуульд элсэх замаар цэрэгт явах хугацаагаа хойшлуулдаг байна.

Орос улс эхэндээ хугацаат цэргийн алба хаагчдыг Украин руу илгээхээс татгалзаж байсан ч хугацаат цэргийн алба хаагчдыг албадан гэрээнд гарын үсэг зуруулж, зарим тохиолдолд олзлогдоно гэсэн хэрэг ил болсноор хэд хэдэн офицерт сахилгын шийтгэл ногдуулжээ.

ОХУ-ын хуулийн дагуу хугацаат цэргийн алба хаагчдыг дайнд явуулахын өмнө дөрвөн сарын бэлтгэлд хамрагдах ёстой.

Уг тогтоолд энэ зорилгоор холбооны төсвөөс хөрөнгө гаргахыг засгийн газраас хүсчээ. Энэ нь 2023 оны нэгдүгээр сарын 1-нээс хэрэгжиж эхэлнэ.

Эх сурвалж: ВВС