/2022.08.19/ Нэгдүгээр ангид элсэх сурагчдын бүртгэл өнөөдөр буюу наймдугаар сарын 19-наас эхэлж байна. Зургаан настнуудын бүртгэлийг E-Mongolia системтэй хамтран улсын хэмжээнд цахимаар зохион байгуулах юм.

Ингэснээр энэ сарын 26-30-ны өдрүүдэд таны хүүхэд аль сургуулийн аль анги, бүлэгт хуваарилагдсаныг таны утсанд мессеж илгээн мэдэгдэх ажээ.

Ингээд Боловсролын ерөнхий газраас гаргасан ЕБС-ийн нэгдүгээр ангийн хүүхдүүдийг хэрхэн бүртгүүлэх талаар заавар, зөвлөмжийг хүргэж байна. Та хүүхдээ цахимаар бүртгүүлэхийн тулд:

• E-Mongolia системд өөрийн бүртгэлээр нэвтэрнэ.
• Үйлчилгээ цэсээс "Боловсрол" цонхыг сонгон нээнэ.
• "Төрийн өмчийн ерөнхий боловсролын сургуулийн нэгдүгээр ангийн элсэлт, бүртгэл" үйлчилгээг сонгоно /Бүртгэл эхлэх өдөр үйлчилгээг олон нийтэд нээлттэй болгоно/.
• Дэлгэцэд таны сургуулийн насны хүүхдүүдийн мэдээлэл гарч ирнэ.
• Сургуульд элсэх хүүхдийнхээ мэдээлэлтэй танилцан, асуултыг бөглөөд үргэлжлүүлэх товч дарна. Үүний дараа таны хүүхдийн элсэлтийн төлөв харагдана.
• Мэдээллээ дахин нягтлаад баталгаажуулах хэсэгт дарж "Тийм" товч дарснаар таны хүсэлт амжилттай илгээгдэнэ.