/2023.07.03/: Хятадад гэр бүлийн хүчирхийллийн хэд хэдэн олны анхаарлыг татсан хэргүүд гарсны дунд гэгээн цагаан өдрөөр үйлдсэн хүн амины хэргийн дүрс бичлэг олон нийтийн мэдээллийн хэрэгслээр тархсан нь олон нийтийн эгдүүцлийг төрүүлж, гэрлэлтийн хор хөнөөлийн талаар залуучуудын дунд маргааныг дахин эхлүүлэв.
Зүүн Шаньдун мужид болсон аллагын бичлэг даваа гарагт цахим сүлжээнд тавигдсаны дараа олны анхаарлыг ихэд татав.
Бичлэгт нэгэн эрэгтэй эмэгтэйг машинаар удаа дараа дайрч байгаа нь гарах бөгөөд дараа нь цагдаа нар хохирогч нь түүний эхнэр болохыг тогтоосон байна. Бичлэгт тухайн эрэгтэй хохирогчийг амьд байгаа эсэхийг дахин дахин шалгаж хэд хэдэн удаа дээгүүр нь дайрч байгаа гардаг.
Мягмар гарагийн орой хийсэн мэдэгдэлд Дунинг хотын цагдаа нар 37 настай эрэгтэйг "гэр бүлийн маргаанаас" болж 38 настай эхнэрээ цохиж, дайрч хөнөөсөн хэргээр саатуулсан гэж мэдэгджээ. Энэ хэрэг мөрдөн байцаалтын шатанд байгаа гэж нэмж хэлэв.
Лхагва гарагийн өглөө гэхэд энэ халдлага Хятадын Twitter-тэй адил Weibo сайтын хамгийн алдартай сэдэв болж, 300 сая хандалт авчээ.
Өнгөрсөн сард өмнөд нутгийн Гуандун мужид нэгэн эр эхнэрээ болон бэр эгчийг нь хутгалж хөнөөсөн хэрэг гарсан. Эхнэр нь олон жилийн турш гэр бүлийн хүчирхийлэлд өртөж, салахаар төлөвлөж байсан гэж гэр бүлийнхэн нь төрийн хэвлэл мэдээллийн хэрэгслээр ярьжээ.
Өнгөрсөн долоо хоногт Чэнду хотын баруун өмнөд хотын нэгэн эмэгтэйтэй холбоотой өөр хэрэг гарсан бөгөөд тэрээр нөхөртөө зодуулсны улмаас сэхээн амьдруулах тасагт найм хоног хэвтсэн гэж мэдүүлжээ. Энэхүү эмэгтэй хүчирхийлэлд удаа дараа өртсөн талаараа олон нийтийн сүлжээнд нийтэлсэн байна. Тэрээр нөхөртэйгөө хоёр жил амьдрахдаа 16 удаа хүчирхийлэлд өртсөн гэж мэдэгджээ.
Энэхүү хэргүүдээс болж Хятадад залуу эмэгтэйчүүд хүнтэй суухгүй, хүүхэд гаргахгүй байж л өөрийгөө хүчирхийллээс ангид байлгана гэх уриа бүхий постууд ар араасаа гарах болсон байна.
Бичлэгийг үзэхийг хүсвэл ЭНД дарна уу.
Эх сурвалж: CNN
