/2021.08.05/: Улаанбаатарчуудын ундны усны эх үүсвэр болсон Туул голын усны урсцыг байгалийн аргаар нэмэгдүүлэх замаар экосистемийн доройтлыг бууруулж, голын сав газрын экологийн нөхцөлийг сайжруулахаар анх 2012 оноос эхлэн Евразийн минжийг өсгөн Туул голын эх түүний цутгал болох Заан, Тэрэлж голуудад нутагшуулах ажил үргэлжилж байна.

Байгальд нутагшуулсан минжийг агнахыг завдах тохиолдлууд гарч болзошгүй тул минж нутагшуулсан байршилтай ойр амьдардаг нутгийн малчид болон аялал зугаалгаар явж буй иргэд минж харсан болон бусад мэдээллийг Нийслэлийн Байгаль орчны газрын 11 323780 дугаарын утсаар холбогдон мэдээлэл солилцож хамтран ажиллахыг хүсье.

Минж нь Амьтны тухай хуулийн 7 дугаар зүйлийн 7.1 дэх заалт болох “Нэн ховор амьтны” жагсаалтад багтсан бөгөөд хууль бусаар агнасан, барьсан, худалдахыг завдсан тохиолдолд Эрүүгийн хуулиар 10 000 нэгжээс 40 000 нэгжтэй тэнцэх буюу 10 саяас 40 сая төгрөгийн мөнгөн торгууль эсхүл 2 жилээс 8 жил хүртэл хорих ялаар шийтгэх хуулийн заалттай.

Эх сурвалж: БОАЖЯ