/2021.12.10/: Бээжингийн олимпийг бойкотлох нь илүүц. Энэ тухай 12-р сарын 9-ний пүрэв гарагт Францын ерөнхийлөгч Эммануэль Макрон мэдэгдэж, Олимпийн хөдөлгөөнийг улс төржүүлэхгүй байхыг уриалав.
“Бид Европын түншүүдтэйгээ хамтран нөхцөл байдалд хяналт тавьж, ямар шийдвэр гаргах ёстойгоо харах болно. Гэхдээ энэ асуудлыг улс төржүүлж болохгүй гэж би бодож байна" гэж Макрон хэвлэлийн бага хурлын үеэр хэлэв.
Үүнээс өмнө буюу арванхоёрдугаар сарын 6-нд АНУ Бээжингийн Өвлийн Олимпийн наадмыг дипломат аргаар бойкотлох шийдвэрээ зарласан. Энэ алхам нь Америкийн тамирчдын наадамд оролцоход нөлөөлөхгүй гэдгийг онцолжээ. Вашингтон ийм шийдвэр гаргах болсон шалтгаанаа “Шинжаан дахь геноцид болон хүний эрхийг зөрчсөн бусад хэрэг” гэж нэрлэсэн байна.
Үүнээс нэг өдрийн дараа Олон улсын олимпийн хороо АНУ-ын шийдвэрийг хүндэтгэж байгаагаа мэдэгдэв. Тус байгууллагын төлөөлөгч тус наадамд төрийн албан хаагчид, дипломатууд оролцох, оролцохгүй байх нь Засгийн газар бүрийн хувийн шийдвэр гэж үзэж байгаагаа илэрхийлэв. Үүний зэрэгцээ ОУОХ-ны тэргүүн Томас Бахын хэлснээр, ОУОХ улс төрийн төвийг сахих байр сууринаас татгалзвал Олимпийн наадам оршин тогтнохоо болино. Тэрээр энэ наадмыг улс төржүүлж болохгүй гэж мэдэгджээ.
Арванхоёрдугаар сарын 8-нд Австрали улс өвлийн олимпийг дипломат аргаар бойкотлохоо зарлав. Харин тус улсын шигшээ баг энэ шийдвэрээс өмнө төлөвлөсний дагуу тэмцээнд оролцоно.
Хариуд нь Их Британийн Ерөнхий сайд Борис Жонсон лхагва гарагт Их Британи 2022 онд Хятадад болох Олимпын спортын бойкотыг дэмжихгүй байгаа ч тус улсын сайд нар арга хэмжээнд оролцох бодолгүй байна гэв. Мөн өдөр Канад улс Наадмыг дипломат аргаар бойкотлохыг дэмжив.
12-р сарын 9-нд ОХУ-ын ГХЯ-ны албан ёсны төлөөлөгч Мария Захарова хэд хэдэн улс ийм шийдвэр гаргаж байгаатай холбогдуулан дэлхийн спорт уналтад орсон тухай ярьж болно гэдгийг онцлон тэмдэглэсэн байна. Түүний хэлснээр, АНУ өөрийн дүрмээр бүрэн ноёрхохыг хүсч байна гэжээ.
Мөн пүрэв гарагт Хятадын ГХЯ-ны хэвлэлийн төлөөлөгч Ван Вэнбинь 2022 оны Олимпийн наадмыг бойкотлосны төлбөрийг АНУ, Канад, Австрали, Их Британи улсууд төлнө гэдгийг онцлон тэмдэглээд, 2022 оны Олимпод зарим орны албаны хүмүүс оролцохгүй байгаа нь тэдний амжилтад нөлөөлөхгүй гэдгийг мэдэгджээ.
Өвлийн XXIV олимп 2022 оны хоёрдугаар сарын 4-20-ны хооронд Бээжинд болно. 2015 оны 7-р сарын 31-нд Куала Лумпурт болсон Олон улсын олимпийн хорооны хуралдаанаар БНХАУ-ын нийслэл сонгогдсон байна.
Эх сурвалж: iz.ru
