Галт уулын үнс 15 км хүртэл өндөрт хүрчээ

Индонезийн алдарт Анак Кракатау галт уул есдүгээр сарын 6-нд хүчтэй дэлбэрч, баруун хэсгийн агаарын тээвэрт томоохон доголдол үүсгэлээ.

Галт уулын үнс Жакарта орчмын агаарын орон зайд тархсаны улмаас тус улсын хамгийн том нисэх буудлуудын нэг болох Soekarno-Hatta International Airport-ын үйл ажиллагааг түр зогсоожээ.

Анак Кракатаугийн үнсэн үүл зарим хэсэгт 15,000 метр буюу 15 км хүртэл өндөрт хүрсэн байна. Галт уулын үнс онгоцны хөдөлгүүр болон нислэгийн системд ноцтой эрсдэл учруулдаг тул нислэгүүдийг түр зогсоох шийдвэр гаргажээ.

Нөхцөл байдлын улмаас Жакартагийн нисэх буудалд 764 нислэг цуцлагдах, саатах, өөр нисэх буудал руу шилжих зэргээр нөлөөлсөн байна. Олон мянган зорчигч нисэх буудалд саатжээ.

Зөвхөн нислэг төдийгүй галт уулын үнснээс үүдэн зарим бүсэд сургуулийн үйл ажиллагааг зогсоож, загасчлалыг түр хориглосон байна. Үнс нь нүд цочроох болон амьсгалын замд сөргөөр нөлөөлөх эрсдэлтэй тул иргэдийг маск зүүж, гадаа аль болох бага гарахыг зөвлөжээ.

Анак Кракатау нь 1883 онд асар их дэлбэрэлтээрээ түүхэнд үлдсэн Кракатаугийн дараа үүссэн галт уул юм. 2018 онд Анак Кракатаугийн дэлбэрэлтээс үүдсэн цунами 430 орчим хүний аминд хүрч байсан ч энэ удаагийн дэлбэрэлтийн хувьд одоогоор цунамигийн аюул байхгүй гэж Индонезийн эрх баригчид мэдээлжээ.