АНУ-ын сансар судлалын агентлаг NASA Ангараг гараг дээр ажиллах харилцаа холбооны сүлжээ байгуулах томоохон гэрээг Blue Origin компанид олголоо.

NASA есдүгээр сарын 1-нд Blue Origin компанитай Ангараг гарагийн харилцаа холбооны сүлжээ (Mars Telecommunications Network) хөгжүүлэх гэрээ байгуулснаа зарлав. Гэрээний нийт үнэ 700 сая ам.долларт хүрч болзошгүй бөгөөд Blue Origin 2028 оны арванхоёрдугаар сарын 31 гэхэд Ангараг гарагийн өндөр хүчин чадалтай харилцаа холбооны тойрог замын аппаратыг бүтээж дуусгах юм.

Шинээр байгуулагдах систем нь Ангараг орчимд ажиллаж буй сансрын хөлгүүдээс дэлхий рүү шинжлэх ухааны мэдээлэл, гэрэл зураг, навигацийн мэдээлэл болон чухал ажиллагааны холбоо мэдээллийг дамжуулах үндсэн үүрэгтэй байна.

Ангараг гараг руу хүн илгээх бэлтгэлийн нэг хэсэг

NASA одоогоор Artemis хөтөлбөрөөр Сарыг судлах ажлаа үргэлжлүүлж байгаа бөгөөд Сарны судалгааг цаашид хүн төрөлхтнийг Ангараг гараг руу илгээх бэлтгэл гэж үзэж байна.

Ангараг гарагийн гадаргуу болон тойрог замд ажиллах олон төрлийн аппарат нэмэгдэхийн хэрээр тэдгээрээс цуглуулсан асар их хэмжээний мэдээллийг Дэлхийд найдвартай дамжуулах шаардлага бий болно. Тиймээс тусгай зориулалтын харилцаа холбооны тойрог замын систем нь ирээдүйн Ангараг гарагийн судалгааны чухал дэд бүтэц болох юм.

Blue Origin-ийн хувьд томоохон төсөл

Blue Origin компани NASA-тай өмнө нь ч хамтран ажиллаж байсан. Тус компани энэ оны эхээр Сарны буугч аппарат бүтээх NASA-ийн гэрээг авсан.

Гэсэн хэдий ч компанийн New Glenn пуужингийн хөтөлбөр тавдугаар сард хөөргөх талбайд гарсан дэлбэрэлтийн улмаас хүндрэлтэй тулгарсан. Blue Origin-ийн гүйцэтгэх захирал талбайн засварыг 2026 оны эцэс гэхэд дуусгана гэж мэдэгдэж байсан бол NASA-ийн захирагч Жаред Айзекман уг байгууламж 2028 он хүртэл ашиглалтад орохгүй байж магадгүй гэж үзжээ.

Ямартаа ч Ангараг гарагийн харилцаа холбооны шинэ гэрээ нь Blue Origin компанийн NASA-тай хамтын ажиллагааг сансрын гүн рүү өргөжүүлэх чухал алхам болж байна.

Ирээдүйд Ангараг гараг дээр хүн болон роботын олон арван аппарат ажиллах үед тэдгээрийг Дэлхийтэй холбох “сансрын холбооны сүлжээ” зайлшгүй шаардлагатай болно. Blue Origin-ийн хэрэгжүүлэх энэхүү төсөл нь тэр дэд бүтцийн эхлэлүүдийн нэг болох юм.

Эх сурвалж: engadget