Европын өдөрлөг энэ БЯМБА гарагт болно
Шуурхай мэдээ
 

Европын өдөрлөг энэ БЯМБА гарагт болно

/2024.05.09/: Бямба гарагт юу хийхээ төлөвлөсөн үү? Таныг гэр бүл, найз нөхдөөрөө “Европын өдөрлөг”-т ирэхийг урьж байна.

Энэхүү арга хэмжээг “Европын өдөр”-ийг тохиолдуулан Сүхбаатарын талбайд тавдугаар сарын 11-ний өдөр 11.00-18.00 цагийн хооронд Европын Холбооноос Монгол Улсад суугаа Төлөөлөгчийн газраас зохион байгуулах гэж байна. Энэ жил Монгол Улс болон Европын Холбоо дипломат харилцаа тогтоосны 35 жилийн ойг тэмдэглэн өнгөрүүлж буйгаараа онцлог юм.

Өдөрлөгийн үеэр Европын Холбооны гишүүн орнуудын соёл уламжлалтай танилцаж, үндэсний хоол амттанаар дайлуулан, хөгжөөнт тоглоом тоглож, урлагийн тоглолт үзэхээс гадна Европын холбооны гишүүн улсууд руу аялах боломж, шенгений виз хэрхэн авах талаар дэлгэрэнгүй зөвлөгөө мэдээлэл өгнө. Европын Холбооны асраар зочилж, боловсролын Эрасмус+ тэтгэлэг, солилцооны хөтөлбөрийн талаар мэдээлэл авах, төгсөгчидтэй уулзаж зөвлөгөө авах боломжтой.

Европын онцлогийг харуулсан өвөрмөц уламжлал, онцгой соёл, аялал жуулчлал, боловсролын боломжууд, бүтээгдэхүүн зэрэг хэрэгтэй мэдээллүүдийг 70 гаруй асарт бүтэн өдрийн туршид толилуулах юм. Түүнчлэн Европын Холбооны санхүүжилтээр Монгол Улсад хэрэгжүүлж байгаа төсөл хөтөлбөрүүд, аж ахуйн нэгжүүд үйл ажиллагаагаа танилцуулна.

Үүгээр ч зогсохгүй бүтэн өдрийн турш Европын соёлын хөтөлбөр тайзнаа үргэлжлэх бөгөөд Унгараас зорин ирсэн уран бүтээлч, Don Turito, Magnet brain, the Royal Heartaches хамтлагийн тоглолт багтаж буй юм.

Энэ жилийн өдөрлөгийг нийгмийн сүлжээгээр шууд дамжуулах тул Монгол Улсын өнцөг булан бүрээс Европын баялаг соёлтой танилцах боломжтой юм. Оргил медиа 3 дахь жилдээ хамтран зохион байгуулж байна.

Жил бүрийн 5 сарын 9-ний өдрийг “Европын өдөр” болгон тэмдэглэдэг билээ. 1950 оны 5-р сарын 9-ний өдөр тухайн үеийн Францын Гадаад хэргийн сайд Роберт Шуман Парис хотод хэлсэн үгэндээ Нүүрс, гангын үйлдвэрлэлийн нийгэмлэг байгуулахыг санал болгосноор, “Шуманы мэдэгдэл” хэмээх энэхүү санаачилга нь Европын Холбооны эхлэл нь болсон. Энэхүү өдрийг Европын Холбоо, түүний гишүүн орнууд төдийгүй дэлхийн өнцөг булан бүрд байгаа төлөөлөгчийн газрууд тэмдэглэн иржээ.

Нийслэлийн шилдэг татвар төлөгчдийг шалгарууллаа
Нийслэлийн шилдэг татвар төлөгчдийг шалгарууллаа
 
Ардчилсан намаас жагсаалтаар нэр дэвших 25 хүний нэрс
Сэтгэгдэл (0)
Анхаар!
Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Мэдээний сэтгэгдлийн хэсгийг mpress.mn сайт хариуцах тул, ёс бус сэтгэгдлийг админ устгах эрхтэй.