/2024.01.26/: Саудын Арабд архины тухай шинэ дүрэм журам гарсантай холбогдуулан нийслэл Эр-Рияд хотод анх удаа архины дэлгүүр нээгдэх гэж байгаа аж.

Лалын шашинт бус дипломат төлөөлөгчийн газруудад архины квотыг зохицуулах журмыг "архи, согтууруулах ундааны бүтээгдэхүүний хууль бус худалдаатай тэмцэх" зорилгоор нэвтрүүлж байна гэж Засгийн газрын Олон улсын харилцааны төв (CIC) мэдэгдэлдээ дурджээ.

Нэгэн эх сурвалж Саудын Араб нийслэл Рияд хотдоо мусульман бус дипломатуудад үйлчлэх анхны архины дэлгүүрээ нээхээр бэлтгэж байна гэжээ.

Саудын Арабт согтууруулах ундаа худалдах, хэрэглэхийг хатуу хориглодог бөгөөд ташуурдуулах, албадан гаргах, торгох, хорих зэрэг шийтгэл ногдуулдаг.

Гэсэн хэдий ч угсаа залгамжлах хунтайж Мохамед бин Салманы удирдлага дор улс нь эдийн засгаа төрөлжүүлэх томоохон алсын харааны хүрээнд аялал жуулчлалын салбараа шинэчлэх чиглэлд шилжсэн. Энэ нь ойрын ирээдүйд Вант улсад архи согтууруулах ундааг хуульчилж магадгүй гэсэн таамаглалыг төрүүлж байна.

Эх сурвалж: CNN