/2023.11.20/: Доминикан улсад өнгөрсөн амралтын өдрүүдэд орсон аадар борооны улмаас 21 хүн амиа алдаж, олон мянган оршин суугчийг нүүлгэн шилжүүлсэн гэж албаны хүмүүс мэдэгдэв.

Нийслэл Санто Доминго хотод аадар борооны улмаас хурдны замын хонгилын хана нурж есөн хүн амиа алдсаны дараа мөрдөн байцаалтын ажиллагааг эхлүүлсэн байна.

Хүчтэй аадар бороо орсны дараа 13 мянга гаруй хүнийг аюулгүй бүс рүү нүүлгэн шилжүүлжээ

Борооны улмаас орон сууцууд усанд автаж, цахилгаан тасарч, гүүр, зам эвдэрсэн гэж Онцгой байдлын төвөөс мэдээллээ.

Амиа алдсан хүмүүсийн дунд гурван хүүхэд байжээ.

Доминиканы Ерөнхийлөгч Луис Абинадер сүүлийн 48 цагийн турш үргэлжилсэн хүчтэй шуурганы дараа тус улсын түүхэнд байгаагүй хамгийн их хур тунадас орсон үйл явдал боллоо гэжээ.

Үерээс 2,500 гаруй хүнийг аварч, 2,600 гаруй байшин шуурганд өртсөн гэж COE мэдэгдэв.

Халуун орны хотгорын улмаас орсон бороо даваа гараг хүртэл тус улсын зарим хэсэгт үргэлжлэх төлөвтэй байна гэж АНУ-ын Элчин сайдын яам мэдэгдэв.

Тус улсын 32 аймгийн дийлэнх нь улаан, шар өнгийн цаг агаарын сэрэмжлүүлэгтэй хэвээр байгаа аж.

Эх сурвалж: ВВС