/2022.04.08/ "Монголын эдийн засгийн чуулган-2022" өнөөдөр хоёр дахь өдрөө болж байна. "Олборлолтоос боловсруулалт руу" сэдэвт салбар хуралдааны үеэр хэн юу хэлэв?
"Оюу толгой" компанийн Санхүү эрхэлсэн дэд захирал Б.Дуламсүрэн:
-Энэ онд ил болон гүний уурхайд нийт 2.2 тэрбум ам.долларын хөрөнгө оруулна. 2021 онд хил нэг сарын турш хаасан. 80 мянган тонн зэсийн баяжмал манай хашаанд бэлэн байна. 100 км тээвэрлэвэл 200 сая ам.долларын орлого олох гээд байна. Сайд нар гэрээ хийж байна гэдэг ч газар дээрээ ажил хэрэг болж чадахгүй, ам.долларын хомстол үүслээ. Боомтыг хариуцан ажиллаж буй хүмүүсээс энэ асуудалд ойрын хугацаанд анхаараач гэж хүсье. Өдөрт 32 машин гаргаж байсныг Хятадын тал 40 машин болгосон.
УИХ-ын гишүүн Г.Тэмүүлэн:
-Сүүлийн 20 жилд уул уурхайн салбараас нийт 143 их наяд төгрөгийн орлого олжээ. Үүний 13 хувь нь л улсын төсөв рүү орсон. Мэргэжлийн хяналтын байцаагчийн шийдвэрээр тусгай зөвшөөрөл цуцалж байсан тохиолдол бий. Ийм алдааг дахин давтахгүй байх хэрэгтэй.
УУХҮ-ийн сайд Г.Ёндон:
-Ашигт малтмалын тухай хуулийг энэ онд зайлшгүй өөрчлөх хэрэгтэй. 2006 оноос хойш энэ хуульд 300 гаруй удаа өөрчлөлт оруулсан ч, суурь өөрчлөлт хийгээгүй. Нүүрс олон улсад эрэлт нь буурч байгаа тул бусад нөөцийг яаралтай ашиглаж эхлэх хэрэгтэй. Ил уурхайг олборлосны дараа гүний уурхайг эхлүүлнэ гэсэн зүйл байхгүй, зэрэг олборлож болно. Сайхан амьдаръя гэвэл уул уурхайн салбарыг дэмжих ёстой.
Саяхан би Ерөнхий сайдтай хамт Баян-Өлгий аймагт ажилласан. Энэ үеэр танхимд цугласан бүх хүн Асгатын мөнгөний ордыг ашиглая гэж 100 хувь санал нэгдсэн.
